سورة النسآء - آیت 80

مَّن يُطِعِ الرَّسُولَ فَقَدْ أَطَاعَ اللَّهَ ۖ وَمَن تَوَلَّىٰ فَمَا أَرْسَلْنَاكَ عَلَيْهِمْ حَفِيظًا

ترجمہ ترجمان القرآن - مولانا ابوالکلام آزاد

جو رسول کی اطاعت کرے، اس نے اللہ کی اطاعت کی، اور جو (اطاعت سے) منہ پھیر لے تو (اے پیغمبر) ہم نے تمہیں ان پر نگراں بنا کر نہیں بھیجا (کہ تمہیں ان کے عمل کا ذمہ دار ٹھہرایا جائے)

تسہیل البیان فی تفسیر القرآن - ام عمران شکیلہ بنت میاں فضل حسین

اللہ کا مطیع وہی ہے جو رسول اللہ کا مطیع ہو۔ کوئی لاکھ دعویٰ کرے کہ وہ اللہ اور قرآن کی اطاعت کرتا ہے وہ جھوٹا ہے جب تک کہ اللہ کے رسول کی سنت کا پابند نہ ہو۔ اللہ تعالیٰ فرماتے ہیں ہر کوئی اپنے اعمال کا خود ذمہ دار ہے۔ ان کے اعمال کی آپ سے باز پُرس نہیں ہوگی، آپ کے سپرد تو صرف یہ کام ہے کہ آپ اللہ کے احکام و ہدایت کو لوگوں تک پہنچادیں۔ اب یہ آپ کا کام نہیں کہ ہاتھ پکڑ کر زبردستی راہ راست پر چلائیں۔