سورة الجمعة

يُسَبِّحُ لِلَّهِ مَا فِي السَّمَاوَاتِ وَمَا فِي الْأَرْضِ الْمَلِكِ الْقُدُّوسِ الْعَزِيزِ الْحَكِيمِ

جومخلوقات آسمانوں اور زمین میں ہیں وہ سب اللہ کی تسبیح بیان کرتی ہیں جو بادشاہ ہے پاک ذات ہے اور بڑا زبردست اور بڑی حکمت والا ہے (١)

اللہ تعالیٰ فرماتا ہے كہ كوئی چیز ایسی نہیں جو اس كی تسبیح اس كی حمد كے ساتھ نہ كرتی ہو۔ تمام مخلوق خواہ آسمان كی ہو۔ خواہ زمین كی، اس كی تعریفوں اور پاكیزگیوں كے بیان میں مصروف ومشغول ہے۔ وہ آسمانوں وزمین كا بادشاہ ہے۔ اور ان دونوں میں اپنا تصرف اور اٹل حكم جاری كرنے والا ہے۔ وہ تمام نقصانات سے پاك اور بے عیب ہے۔ تمام صفات كمالیہ كے ساتھ موصوف ہے وہ عزیز اور حكیم ہے۔