سورة الصف - آیت 12

يَغْفِرْ لَكُمْ ذُنُوبَكُمْ وَيُدْخِلْكُمْ جَنَّاتٍ تَجْرِي مِن تَحْتِهَا الْأَنْهَارُ وَمَسَاكِنَ طَيِّبَةً فِي جَنَّاتِ عَدْنٍ ۚ ذَٰلِكَ الْفَوْزُ الْعَظِيمُ

ترجمہ ترجمان القرآن - مولانا ابوالکلام آزاد

اگر تم نے ایسا کیا تو اللہ تمہارے قصوروں سے درگزر کرے گا اور تم کو کامیابی وبامرادی کیا ایسے باغ ہائے نشاط میں پہنچا دے گا جہاں (اشک حسرت ونامرادی کی جگہ عیش مراد کی) نہریں بہہ رہی ہوں گی نیز ایسے مکانات طیبہ میں، جودائمی مسرتوں کے باغوں میں ہیں، تمہیں بسائے رکھے گا (غور کرو تو) یہی سب سے بڑی کامیابی ہے

تسہیل البیان فی تفسیر القرآن - ام عمران شکیلہ بنت میاں فضل حسین

پھر فرمایا اگر تم میری بتلائی ہوئی تجارت كے تاجر بن گئے تو میں تمہاری ہر لغزش سے، ہر گناہ سے درگزر كر لوں گا اور جنت كے پاكیزہ محلات میں اور بلند و بالا درجات میں تمہیں پہنچاؤں گا۔ تمہارے بالا خانوں اور ان ہمیشگی والے باغات كے درختوں تلے سے صاف شفاف نہریں پوری روانی سے جاری ہوں گی۔ یقین مانو بہت بڑی كامیابی اور اعلیٰ مزدوری یہی ہے۔