حُرِّمَتْ عَلَيْكُمْ أُمَّهَاتُكُمْ وَبَنَاتُكُمْ وَأَخَوَاتُكُمْ وَعَمَّاتُكُمْ وَخَالَاتُكُمْ وَبَنَاتُ الْأَخِ وَبَنَاتُ الْأُخْتِ وَأُمَّهَاتُكُمُ اللَّاتِي أَرْضَعْنَكُمْ وَأَخَوَاتُكُم مِّنَ الرَّضَاعَةِ وَأُمَّهَاتُ نِسَائِكُمْ وَرَبَائِبُكُمُ اللَّاتِي فِي حُجُورِكُم مِّن نِّسَائِكُمُ اللَّاتِي دَخَلْتُم بِهِنَّ فَإِن لَّمْ تَكُونُوا دَخَلْتُم بِهِنَّ فَلَا جُنَاحَ عَلَيْكُمْ وَحَلَائِلُ أَبْنَائِكُمُ الَّذِينَ مِنْ أَصْلَابِكُمْ وَأَن تَجْمَعُوا بَيْنَ الْأُخْتَيْنِ إِلَّا مَا قَدْ سَلَفَ ۗ إِنَّ اللَّهَ كَانَ غَفُورًا رَّحِيمًا
تم پر حرام کردی گئی ہیں تمہاری مائیں، تمہاری بیٹیاں، تمہاری بہنیں، تمہاری پھوپھیاں، تمہاری خالائیں، اور بھتیجیاں اور بھانجیاں، اور تمہاری وہ مائیں جنہوں نے تمہیں دودھ پلایا ہے، اور تمہاری دودھ شریک بہنیں، اور تمہاری بیویوں کی مائیں، اور تمہارے زیر پرورش تمہاری سوتیلی بیٹیاں (١٩) جو تمہاری ان بیویوں (کے پیٹ) سے ہوں جن کے ساتھ تم نے خلوت کی ہو۔ ہاں اگر تم نے ان کے ساتھ خلوت نہ کی ہو (اور انہیں طلاق دے دی ہو یا ان کا انتقال ہوگیا ہو) تو تم پر (ان کی لڑکیوں سے نکاح کرنے میں) کوئی گناہ نہیں ہے، نیز تمہارے صلبی بیٹوں کی بیویاں بھی تم پر حرام ہیں، اور یہ بات بھی حرام ہے کہ تم دو بہنوں کو ایک ساتھ نکاح میں جمع کرو، البتہ جو کچھ پہلے ہوچکا وہ ہوچکا۔ بیشک اللہ بہت معاف کرنے والا، بڑا مہربان ہے۔
رضاعت کے رشتے اور احکام رضاعت: سیدنا عباس رضی اللہ عنہما نے فرمایا کہ رسول اللہ نے فرمایا : ’’جو رشتے نسب کی رو سے حرام ہیں وہ رضاعت کی رو سے بھی حرام ہوجاتے ہیں۔ (بخاری: ۵۰۹۹) ۲۔ حضرت عائشہ رضی اللہ عنہا سے روایت ہے كہ رسول اللہ صلی اللہ علیہ وسلم نے فرمایا: ’’رضاعت وہ ہی معتبر ہے جو کم سنی میں بھوک بند کرے۔‘‘ (بخاری: ۲۶۴۷) حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے فرمایا: ایک باریا دوباردودھ چوسنے سے رضاعت کی حرمت ثابت نہیں ہوتی۔ (ترمذی: ۱۱۵۰، مسلم۵۰) رضاعت کی مدت جس کے اندردودھ چوسنے سے رضاعت ثابت ہوتی ہے وہ دو سال تک ہے۔ امام ابو حنیفہ کے سوا تمام فقہا اسی کے قائل ہیں البتہ امام ابو حنیفہ رضاعت کی مدت اڑھائی سال قرار دیتے ہیں اور ان کے نزدیک ایک دفعہ چوسنے یا ایک گھونٹ پینے سے بھی رضاعت ثابت ہوجاتی ہے۔ سنت کی روح سے حرام رشتے: قرآن میں صرف دو حقیقی بہنوں کو نکاح میں جمع کرنے کی ممانعت مذکور ہے۔ جبکہ حدیث میں پھوپھی اور بھتیجی کو اور خالہ اور بھانجی کو بھی ایک نکاح میں جمع کرنے کی ممانعت آتی ہے۔ سید نا جابر رضی اللہ عنہ سے روایت ہے کہ آپ صلی اللہ علیہ وسلم نے فرمایا ’’پھوپھی بھتیجی، خالہ اور بھانجی کو بھی نکاح میں جمع نہ کیا جائے۔ (بخاری: ۵۱۰۹) مذکورہ آیت کی رو سے حرام رشتوں کی تفصیل :(۱)مائیں اور ان کی دادیاں، نانیاں بھی شامل ہیں۔۔۔۔ آخر تک ۔ (۲)بیٹیاں اور ان کی پوتیاں، نواسیاں بھی شامل ہیں تاآخر۔ (۳) بہنیں اور ان کی سگی، علاتی اور اخیافی بہنیں سب شامل ہیں۔ (۴) پھوپھیاں۔ (۵)خالائیں خواہ یہ سگی ہوں یا اخیافی یا علاتی، سب حرام ہیں۔ (۶) بھتیجیاں اور ان کی بیٹیاں۔ (۷) بھانجیاں اور ان کی بیٹیاں۔ (۷) رضاعی مائیں۔ (۸)رضاعی بہنیں اور رضاعت کی رو سے وہ سب رشتے حرام ہیں جو نسب کی رو سے حرام ہیں۔ (۱۰)ساس اور سالیاں جب تک ان کی بہن نکاح میں ہو (۱۱) بیٹیاں اور سوتیلی بیٹیاں۔ (۱۲) بہو (حقیقی بیٹے کی بیوہ) سے نکاح حرام ہے ۔ (۱۳) دو بہنوں کو بیک وقت نکاح میں جمع کرنا حرام ہے۔ اس حکم کے بعد فوراً ایک کو طلاق دے دی جائے گی۔ (۱۴) اگلی آیت (۲۴) کی رو سے تمام شوہر والی عورتیں بھی حرام ہیں۔