سورة الواقعة

نَحْنُ جَعَلْنَاهَا تَذْكِرَةً وَمَتَاعًا لِّلْمُقْوِينَ

ہم نے اسے یادگار اور مسافروں کے لیے فائدہ بخش بنایا

مسافروں کے فائدے کی چیز: مقوین: یہ مُقْوٍ کی جمع ہے یہ قَوَآئً سے مشتق ہے جس کا معنی ہے خالی صحرا میں داخل ہونا مراد مسافر ہے، یعنی مسافر صحراؤں اور جنگلوں میں ان درختوں سے فائدہ اٹھاتے ہیں اس سے روشنی، گرمی اور ایندھن حاصل کرتے ہیں۔ بعض نے مقوی سے وہ فقرا مراد لیے ہیں جو بھوک کی وجہ سے خالی پیٹ ہوں۔ بعض نے اس کے معنی مُسْتَمْتِعِیْنَ (فائدہ اٹھانے والے) کے کیے ہیں۔ اس میں امیر، غریب، مقیم اور مسافر سب آجاتے ہیں اور سب ہی آگ سے فائدہ اٹھاتے ہیں، حدیث میں ہے۔ حضور صلی اللہ علیہ وسلم نے فرمایا: تین چیزوں میں تمام مسلمانوں کا برابر حصہ کا ہے۔ پانی، آگ اور گھاس۔ (ابوداؤد: ۳۴۷۷) امام ابن کثیر نے اس مفہوم کو زیادہ پسند کیا ہے۔