پس تم ان کے پیچھے چلو: یعنی تمہارے درمیان اللہ کا رسول صلی اللہ علیہ وسلم موجود ہے۔ ایسی خبریں تم ان تک پہنچا دو۔ خود رائے زنی نہ کرنے لگ جاؤ۔ بلکہ ان کے پیچھے پیچھے چلو۔ جو وہ کہیں اسے تسلیم کرو۔ اگر وہ تمہارا مشورہ قبول نہیں کرتے تو برا نہ مانو۔ اگر وہ تم سب کے مشورے اور آرا قبول کرنے لگیں تو تمہاری آرا بھی تو آپس میں مختلف اور متضاد ہوتی ہیں۔ اس صورت میں تم پر کئی اور مصیبتیں پڑ جائیں گی۔ لہٰذا حق کو اپنی خواہشات کے پیچھے نہ چلاؤ۔ بلکہ اپنی خواہشات اور آرا کو حق کے تابع کر دینے کی ادا سیکھو۔