سورة آل عمران

لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ أَوْ يُعَذِّبَهُمْ فَإِنَّهُمْ ظَالِمُونَ

(اے پیغبر) تمہیں اس فیصلے کا کوئی اختیار نہیں کہ اللہ ان کی توبہ قبول کرے یا ان کو عذاب دے کیونکہ یہ ظالم لوگ ہیں۔ *

اس آیت کا سبب نزول یہ واقعہ ہے کہ جنگ اُحد میں رسول اللہ صلی اللہ علیہ وسلم کا سامنے كے دانت ٹوٹ گئے اور سرزخمی ہوگیا۔ آپ صلی اللہ علیہ آلہ وسلم اپنے چہرے سے خون پونچھتے جاتے اور فرماتے ’’وہ قوم کیسے فلاح پائے گی جس نے اپنے نبی کا سر زخمی کردیا اور دانت توڑ دیاحالانکہ وہ انھیں اللہ کی طرف دعوت دے رہا تھا۔‘‘ (بخاری: ۴۰۶۹، مسلم: ۱۷۹۱) تو اس موقعہ پر یہ آیت نازل ہوئی، چنانچہ حدیث میں آتا ہے عبداللہ بن عمر سے روایت ہے کہ فجر کی نماز دوسری رکعت سے سر اٹھا کر بد دعا کی، رکوع کے بعد پھر بد دعا کی تو اللہ نے یہ آیت اتاری کہ آپ کو فیصلہ کرنے کا کوئی حق نہیں۔ (بخاری : ۴۰۶۹) مختار کل اور عالم الغیب صرف اللہ تعالیٰ ہے: یہ قبیلے جن کے لیے آپ بد دعا فرماتے رہے انھیں اللہ تعالیٰ نے آپ کے قدموں میں لا ڈالا اور اسلام کے جانباز سپاہی بنادیا۔