ضُرِبَتْ عَلَيْهِمُ الذِّلَّةُ أَيْنَ مَا ثُقِفُوا إِلَّا بِحَبْلٍ مِّنَ اللَّهِ وَحَبْلٍ مِّنَ النَّاسِ وَبَاءُوا بِغَضَبٍ مِّنَ اللَّهِ وَضُرِبَتْ عَلَيْهِمُ الْمَسْكَنَةُ ۚ ذَٰلِكَ بِأَنَّهُمْ كَانُوا يَكْفُرُونَ بِآيَاتِ اللَّهِ وَيَقْتُلُونَ الْأَنبِيَاءَ بِغَيْرِ حَقٍّ ۚ ذَٰلِكَ بِمَا عَصَوا وَّكَانُوا يَعْتَدُونَ
وہ جہاں کہیں پائے جائیں، ان پر ذلت کا ٹھپہ لگا دیا گیا ہے، الا یہ کہ اللہ کی طرف سے کوئی سبب پیدا ہوجائے یا انسانوں کی طرف سے کوئی ذریعہ نکل آئے جو ان کو سہارا دیدے، انجام کار وہ اللہ کا غضب لے کر لوٹے ہیں اور ان پر محتاجی مسلط کردی گئی ہے۔ اس کی وجہ یہ ہے وہ اللہ کی آیتوں کا انکار کرتے تھے، اور پیغمبروں کو ناحق قتل کرتے تھے۔ (نیز) اس کی وجہ یہ ہے کہ وہ نافرمانی کرتے تھے، اور ساری حدیں پھلانگ جایا کرتے تھے۔
اس آیت میں اللہ تعالیٰ نے یہود کی ذلت و رسوائی کے اسباب بیان فرمائے ہیں۔ جو یہ ہیں: (۱) انھوں نے نافرمانی کی راہ اختیار کی۔ (۲) اللہ کی حدود سے تجاوز کیا۔ (۳) اللہ کی آیات کا انکار کیا۔ (۴) حق کو چھپایا۔ (۵) اللہ کی کتاب میں تحریف کی، حتیٰ کہ انبیاء کو ناحق قتل کر دیا۔ جب ان كی بدبختی انتہاء کو پہنچ گئی تو ان پر اللہ کا غضب نازل ہوا، ذلت و رسوائی اور محتاجی ان کا مقدر کردی گئی۔ بچاؤ کی دو صورتیں۔ وقتی طور پر بچاؤ کی دو صورتیں بتائی گئی ہیں۔ (۱) اللہ کی پناہ میں آجائیں یعنی اسلام قبول کرلیں، یا اسلامی مملکت میں جزیہ دے کر ذمی کی حیثیت سے رہنا قبول کرلیں۔ (۲) دوسری صورت یہ ہے کہ غیر مسلم حکومتوں کے سایہ تلے رہیں۔ چنانچہ ہم دیکھتے ہیں کہ 1947ء تک اس کے کہ یہود باوجود دنیا کی مالدار ترین قوم تھے، پھر بھی دربدر پھرتے ہی رہے 1947ء کے بعد عیسائیوں یعنی برطانیہ اور فرانس اور امریکہ کی مدد سے ان یہودیوں کے لیے ایک چھوٹی ریاست قائم کی گئی ہے اگر آج یہ حکومتیں اسرائیل کی حمایت ترک کردیں تو فوراً اس کا وجود ہی ختم ہوجائے گا۔