سورة السجدة - آیت 19

أَمَّا الَّذِينَ آمَنُوا وَعَمِلُوا الصَّالِحَاتِ فَلَهُمْ جَنَّاتُ الْمَأْوَىٰ نُزُلًا بِمَا كَانُوا يَعْمَلُونَ

ترجمہ ترجمان القرآن - مولانا ابوالکلام آزاد

جولوگ اللہ کے احکام پر ایمان لائے اور اعمال صالحہ اختیار کیے ان کے لیے کامیابیوں اور فتح مندیوں کے شاداب باغ وچمن ہوں گے جن میں وہ شاد وخرم رہیں گے اور یہ باغ ہائے فتح ومراد ان کے نیک کاموں کا بدلہ ہیں

تسہیل البیان فی تفسیر القرآن - ام عمران شکیلہ بنت میاں فضل حسین

ان آیات میں دونوں قسموں کا تفصیلی بیان ہے کہ جس نے اپنے دل میں کلام اللہ کی تصدیق کی اور اس کے مطابق عمل بھی کیا تو انھیں وہ جنتیں ملیں گی جن میں مکانات ہیں بالا خانے ہیں، اور رہائش و آرام کے تمام سامان ہیں یہ ان کی نیک اعمالی کے بدلے میں مہمانی ہو گی۔ اور جن لوگوں نے اطاعت چھوڑ دی ان کی جگہ جہنم میں ہو گی جس میں سے وہ نکل نہ سکیں گے۔ چنانچہ ارشاد ہے: ﴿كُلَّمَا اَرَادُوْا اَنْ يَّخْرُجُوْا مِنْهَا مِنْ غَمٍّ اُعِيْدُوْا فِيْهَاوَ ذُوْقُوْا عَذَابَ الْحَرِيْقِ﴾ (الحج: ۲۲) ’’جب کبھی وہاں کے غم سے چھٹکارا چاہیں گے دوبارہ وہیں جھونک دئیے جائیں گے۔‘‘