سورة النمل - آیت 25

أَلَّا يَسْجُدُوا لِلَّهِ الَّذِي يُخْرِجُ الْخَبْءَ فِي السَّمَاوَاتِ وَالْأَرْضِ وَيَعْلَمُ مَا تُخْفُونَ وَمَا تُعْلِنُونَ

ترجمہ ترجمان القرآن - مولانا ابوالکلام آزاد

کہ وہ اس اللہ کو سجدہ کریں جو آسمانوں اور زمین کی چھپی ہوئی چیزوں کو باہر نکالتا ہے اور جو کچھ تم ظاہر کرتے ہو اور جو کچھ چھپاتے ہو وہ اس سب کو جانتا ہے

تسہیل البیان فی تفسیر القرآن - ام عمران شکیلہ بنت میاں فضل حسین

اس آیت کامطلب یہ ہے کہ سجدہ کرنے کے لائق تو وہ ذات ہے جو زمین و آسمان سے ان پوشیدہ چیزوں اور مخفی قوتوں کو بُروئے کار لا کر ان کی روزی کاسامان مہیا کرتی ہے نہ کہ سورج اور اس جیسی دوسری بے جان مخلوق یا محتاج اشیاء یعنی آسمان سے بارش برسانا اور زمین سے اس کی مخفی چیزیں، معدنیات، نباتات اور دیگر زمینی خزانے ظاہر فرماتا اور نکالتا ہے۔ نیز سجدہ کے لائق وہ ذات ہے جس کاعلم اتنا وسیع ہو جو صرف زمین و آسمان کی پوشیدہ قوتوں کو ہی نہیں جانتی بلکہ وہ تمہارے بھی سب ظاہری اور پوشیدہ اعمال سے پوری طرح واقف ہے۔