سورة النمل - آیت 10

وَأَلْقِ عَصَاكَ ۚ فَلَمَّا رَآهَا تَهْتَزُّ كَأَنَّهَا جَانٌّ وَلَّىٰ مُدْبِرًا وَلَمْ يُعَقِّبْ ۚ يَا مُوسَىٰ لَا تَخَفْ إِنِّي لَا يَخَافُ لَدَيَّ الْمُرْسَلُونَ

ترجمہ ترجمان القرآن - مولانا ابوالکلام آزاد

اور اپنا عصا ڈال دے پھر جب موسیٰ نے اس عصا کو دیکھا کہ وہ سانپ کی طرح بل کھارہا ہے تو موسیٰ پیٹھ پھیر کربھاگا اور پلٹ کر بھی نہ دیکھا (ارشاد ہوا) اے موسیٰ ڈرو نہیں، میرے حضور پہنچ کر پیغمبر ڈرا نہیں کرتے

تسہیل البیان فی تفسیر القرآن - ام عمران شکیلہ بنت میاں فضل حسین

نبی کو نبوت سے پہلے اپنے نبی بننے کا علم نہیں ہوتا۔ اس آیت سے کئی امور پر روشنی پڑتی ہے مثلاً سیدنا موسیٰ علیہ السلام کی لاٹھی سانپ بن جانے کا معجزہ آپ کو سب سے پہلے اسی مقام پر عطا ہواتھا۔ دوسرا طبعی خوف پیغمبر کو بھی لاحق ہوسکتاہے کیونکہ وہ بھی بالآخر انسان ہی ہوتے ہیں ۔ تیسرے یہ کہ پیغمبر عالم الغیب نہیں ہوتے، موسیٰ علیہ السلام کو قطعی طور پر علم نہ تھاکہ آپ کو نبوت عطا ہوگی اور نبوت یا رسالت عطا ہونے کے وقت طبیعت گراں بار ہوجاتی ہے اور کچھ نا معلوم سا خطرہ محسوس ہونے لگتاہے۔ جیساکہ رسول اللہ صلی اللہ علیہ وآلہ وسلم کو بھی غار حرا میں ایسا خوف لاحق ہواتھااسی لیے اللہ تعالیٰ نے تسلی دیتے ہوئے فرمایا کہ’’رسول میرے حضور ڈرا نہیں کرتے۔ ‘‘