سورة النور - آیت 44

يُقَلِّبُ اللَّهُ اللَّيْلَ وَالنَّهَارَ ۚ إِنَّ فِي ذَٰلِكَ لَعِبْرَةً لِّأُولِي الْأَبْصَارِ

ترجمہ ترجمان القرآن - مولانا ابوالکلام آزاد

(مگر) وہ رات اور دن کا الٹ پھیر کرتا رہتا ہے (اس لیے کوئی حالت بھی یہاں یکساں نہیں رہتی) بلاشبہ اس صورت حال میں ان لوگوں کے لیے بڑی ہی عبرت ہے جو صاحب بصیرت ہیں (٣٤)۔

تسہیل البیان فی تفسیر القرآن - ام عمران شکیلہ بنت میاں فضل حسین

گردش لیل ونہار: رات اور دن کا باری باری آنا بھی اللہ کی معرفت کی نشانیوں میں ایک بڑی نشانی ہے۔ وہ جب چاہتا ہے دن کو چھوٹا اور رات کو بڑا کر دیتا ہے اور جب چاہتا ہے رات کو چھوٹا کر کے دن کو بڑا کر دیتا ہے۔ یہ تمام نشانیاں اللہ کی عظمت کو آشکارا کرتی ہیں جیسے کہ فرمانِ الٰہی ہے کہ آسمان وزمین کی پیدائش، رات دن کے اختلاف میں عقلمندوں کے لیے بہت سی نشانیاں ہیں۔