قَالَ بَل رَّبُّكُمْ رَبُّ السَّمَاوَاتِ وَالْأَرْضِ الَّذِي فَطَرَهُنَّ وَأَنَا عَلَىٰ ذَٰلِكُم مِّنَ الشَّاهِدِينَ
ابراہیم نے کہا نہیں میں کہتا ہوں، آسمان اور زمین کا پروردگار جس نے ان سب کو پیدا کیا، وہی تمہارا بھی پروردگار ہے، میں اس حقیقت پر تمہارے آگے گواہ ہوں۔
آپ کو تبلیغ کا موقع ملا اور صاف اعلان کر دیا کہ میں دل لگی کی بات نہیں کرتا بلکہ فی الواقع یہی کچھ سمجھتا ہوں کہ یہ پتھر کے بت جو اپنے نفع و نقصان کے مالک نہیں وہ تمھارے نفع و نقصان کے مالک کیسے بن سکتے ہیں، اور مالک تو صرف وہی ہے جس نے زمین و آسمان، اور ہم سب کو، پیدا کیا، تمام چیزوں کا خالق و مالک وہی ہے۔ تمھارے یہ معبود کسی ادنیٰ چیز کے بھی نہ خالق ہیں اور نہ مالک پھر معبود و مسجود کیسے ہو گئے؟ میری گواہی ہے کہ خالق ومالک اللہ ہے جو لائق عبادت ہے۔ نہ اس کے سوا کوئی رب ہے نہ کوئی معبود۔