وَاللَّهُ جَعَلَ لَكُم مِّن بُيُوتِكُمْ سَكَنًا وَجَعَلَ لَكُم مِّن جُلُودِ الْأَنْعَامِ بُيُوتًا تَسْتَخِفُّونَهَا يَوْمَ ظَعْنِكُمْ وَيَوْمَ إِقَامَتِكُمْ ۙ وَمِنْ أَصْوَافِهَا وَأَوْبَارِهَا وَأَشْعَارِهَا أَثَاثًا وَمَتَاعًا إِلَىٰ حِينٍ
اور (دیکھو) اللہ نے تمہارے گھروں کو تمہارے لیے سکونت کی جگہ بنا دیا۔ نیز تمہارے لیے چارپایوں کی کھالوں سے گھر بنا دیے (یعنی خیمے، جنہیں ایک جگہ سے دوسری جگہ اپنے ساتھ لیے پھرتے ہو) کوچ کرو یا اقامت کی حالت میں ہو، دونوں حالتوں میں نہایت سبک۔ اور پھر چارپایوں کی اون سے اوروں سے اور بالوں سے کتنے ہی سامان اور مفید چیزیں بنا دیں کہ ایک خاص وقت تک کام دیتی ہیں۔
احسانات الٰہی کی ایک جھلک: ان آیات میں اللہ کے ان گنت احسانات وانعامات کاذکرہے۔جوانسان کوخارجی اثرات مثلاًدھوپ،گرمی، سردی، بارش،وغیرہ سے محفوظ رکھتے ہیں ان نعمتوں میں سب سے پہلے ان گھروں کا ذکر ہے جنہیں لوگ آبادیوں میں اپنی رہائش کے لیے بناتے ہیں، جومٹی، اینٹ،پتھر،گاراورلکڑی وغیرہ سے تیارہوتے ہیں۔اوریہ سب چیزیں زمین سے حاصل ہوتی ہیں جسے اللہ نے انسان کی پیدائش سے مدتوں پہلے پیداکردیاتھا،پھرخانہ بدوشوں کے گھروں کاذکرفرمایا۔جوپہلی قسم کے گھروں کی نسبت بہت ہلکے پھلکے اورقابل انتقال ہوتے ہیں یہ وہ خیمے ہیں جو چوپائے جانوروں کی کھالوں سے بنتے ہیں۔پھربکریوں کے بال،اونٹوں کے بال،بھیڑوں اوردنبوں کی اون،تجارت کے لیے مال کے طور پر تمہارے لیے بنایا ہے اوریہ گھرکے برتنے کی چیزبھی ہے جس سے کپڑے بھی بنتے ہیں فرش یعنی قالین بھی تیارہوتے ہیں۔مال تجارت کے طورپربھی فائدے کی چیزہے جس سے لوگ مقررہ وقت تک فائدہ اٹھاتے ہیں۔