سورة النحل - آیت 65

وَاللَّهُ أَنزَلَ مِنَ السَّمَاءِ مَاءً فَأَحْيَا بِهِ الْأَرْضَ بَعْدَ مَوْتِهَا ۚ إِنَّ فِي ذَٰلِكَ لَآيَةً لِّقَوْمٍ يَسْمَعُونَ

ترجمہ ترجمان القرآن - مولانا ابوالکلام آزاد

اور (دیکھو) اللہ نے آسمان سے پانی برسایا پھر اس کی آب پاشی سے زمین کو جو مردہ ہوچکی تھی (ازسرنو) زندہ کردیا۔ بلاشبہ اس صورت حال میں ان لوگوں کے لیے ایک نشانی ہے جو (صدائے حق کو جی لگا کر) سنتے ہیں۔

تسہیل البیان فی تفسیر القرآن - ام عمران شکیلہ بنت میاں فضل حسین

زمین خشک اور بالکل بے آب و گیاہ پڑی ہوتی ہے مگر برسات کے موسم میں ہر طرف جڑی بوٹیاں، گھاس، درخت،پودے وغیرہ از خود پیدا ہونے لگتے ہیں جن کے بیج مدتوں پہلے زمین میں دبے ہوئے تھے، پھر اس موسم میں مینڈک اور کئی قسم کے حشرات الارض بھی پیداہوجاتے ہیں جن کا نام ونشان تک مٹ چکاہوتاہے اور یہ منظر تم اپنی زندگی میں بار بار دیکھتے ہو۔ بالکل ایسی ہی صورت حال انسان کو دوبارہ پیدائش کی ہوگی ۔ انسان کا جسم خواہ مٹی میں مل کر مٹی بن چکاہو، نفخہ صور ثانی یا روحانی قسم کی بارش سے دوبارہ جی اٹھیں گے۔