سورة ابراھیم - آیت 46

وَقَدْ مَكَرُوا مَكْرَهُمْ وَعِندَ اللَّهِ مَكْرُهُمْ وَإِن كَانَ مَكْرُهُمْ لِتَزُولَ مِنْهُ الْجِبَالُ

ترجمہ ترجمان القرآن - مولانا ابوالکلام آزاد

ان لوگوں نے اپنی ساری تدبیریں کر ڈالی تھیں اور اگرچہ ان کی تدبیریں ایسی تھیں کہ پہاڑوں کو جگہ سے ہلا دیں مگر اللہ کے پاس ان کی ساری تدبیروں کا جواب تھا، (ان کی کوئی تدبیر بھی ظہور نتائج کو نہ روک سکی)

تسہیل البیان فی تفسیر القرآن - ام عمران شکیلہ بنت میاں فضل حسین

یعنی ان کی چالیں اس قدر یقینی اور تیربہدف تھیں کہ ان کے خطا ہونے کی توقع نہیں کی جاسکتی تھی ۔ یعنی انہوں نے باطل کے اثبات اور حق کو رد کرنے کے لیے مقدور بھر حیلے اور مکر کئے ۔ اور ہم نے ان کے ساتھ جو کیا وہ کیا، اللہ کو ان کی تمام چالوں کاعلم ہے جس کی وہ ان کو سزا دے گا ۔ پہاڑ بھی ٹل جائیں، یعنی یقیناً ان کے مکر تو اتنے بڑے تھے کہ پہاڑ بھی اپنی جگہ سے ہل جاتے یہ تو اللہ تعالیٰ ہی ہے جس نے ان کے مکروں کو کامیاب ہونے نہیں دیا، جیسے مشرکین کے شرک کے بارے میں اللہ فرماتاہے۔ ﴿تَكَادُ السَّمٰوٰتُ يَتَفَطَّرْنَ مِنْهُ وَ تَنْشَقُّ الْاَرْضُ وَ تَخِرُّ الْجِبَالُ هَدًّا۔ اَنْ دَعَوْا لِلرَّحْمٰنِ وَلَدًا﴾ (مریم: ۹۰۔ ۹۱) قریب ہے کہ آسمان پھٹ پڑیں اور زمین شق ہوجائے اور پہاڑریزہ ریزہ ہوجائیں اس بات پر کہ انہوں نے کہا’’اللہ رحمن کی اولاد ہے ‘‘ ۔