سورة یونس - آیت 34

قُلْ هَلْ مِن شُرَكَائِكُم مَّن يَبْدَأُ الْخَلْقَ ثُمَّ يُعِيدُهُ ۚ قُلِ اللَّهُ يَبْدَأُ الْخَلْقَ ثُمَّ يُعِيدُهُ ۖ فَأَنَّىٰ تُؤْفَكُونَ

ترجمہ ترجمان القرآن - مولانا ابوالکلام آزاد

(اے پیغمبر) ان سے پوچھو : کیا تمہارے ٹھہرائے ہوئے شریکوں میں کوئی ایسا ہے جو خلقت کی پیدائش شروع کرے اور پھر اسے دہرائے؟ تم کہو یہ تو اللہ ہے جو ابتدا میں پیدا کرتا ہے پھر اسے دہرائے گا، پس غور کرو تمہاری الٹی چال تمہیں کدھر کو لے جارہی ہے؟

تسہیل البیان فی تفسیر القرآن - ام عمران شکیلہ بنت میاں فضل حسین

مشرکین یہ تو مانتے تھے کہ اللہ ہی نے انھیں اور ساری کائنات کو پیدا کیا۔ یہاں مشرکین کے کھوکھلے پن کو واضح کرنے کے لیے ان سے پوچھا جا رہا ہے کہ بتاؤ جنھیں تم اللہ کا شریک گردانتے ہو، کیا تمھارے معبودوں میں سے ایک بھی ایسا ہے جو آسمان و زمین کو اور مخلوق کو پیدا کر سکے۔ یا بگاڑ کر بنا سکے، نہیں یقینا نہیں، پہلی مرتبہ پیدا کرنے والا بھی اللہ ہی ہے۔ (تیسیر القرآن)