سورة التوبہ - آیت 111

إِنَّ اللَّهَ اشْتَرَىٰ مِنَ الْمُؤْمِنِينَ أَنفُسَهُمْ وَأَمْوَالَهُم بِأَنَّ لَهُمُ الْجَنَّةَ ۚ يُقَاتِلُونَ فِي سَبِيلِ اللَّهِ فَيَقْتُلُونَ وَيُقْتَلُونَ ۖ وَعْدًا عَلَيْهِ حَقًّا فِي التَّوْرَاةِ وَالْإِنجِيلِ وَالْقُرْآنِ ۚ وَمَنْ أَوْفَىٰ بِعَهْدِهِ مِنَ اللَّهِ ۚ فَاسْتَبْشِرُوا بِبَيْعِكُمُ الَّذِي بَايَعْتُم بِهِ ۚ وَذَٰلِكَ هُوَ الْفَوْزُ الْعَظِيمُ

ترجمہ ترجمان القرآن - مولانا ابوالکلام آزاد

بلاشبہ اللہ نے مومنوں سے ان کی جانیں بھی خرید لیں اور ان کا مال بھی، اور اس قیمت پر خرید لیں کہ ان کے لیے بہشت (کی جاودانی زندگی) ہو، وہ (کسی دنیوی مقصد کی راہ میں نہیں بلکہ) اللہ کی راہ میں جنگ کرتے ہیں، پس مارتے بھی ہیں اور مرتے بھی ہیں، یہ وعدہ اللہ کے ذمہ ہوچکا (یعنی اس نے ایسا ہی قانون ٹھہرا دیا) تورات انجیل اور قرآن (تینوں کتابوں) میں (یکساں طور پر) اس کا اعلان ہے اور اللہ سے بڑھ کر کون ہے جو اپنا عہد پورا کرنے والا ہو؟ پس (مسلمانو) اپنے اس سودے پر جو تم نے اللہ سے چکایا خوشیاں مناؤ اور یہی ہے جو بڑی سی بڑی فیروز مندی ہے۔

تسہیل البیان فی تفسیر القرآن - ام عمران شکیلہ بنت میاں فضل حسین

مجاہدین کے لیے انعامات: اللہ تعالیٰ فرماتے ہیں کہ مومن بندے جب راہ حق میں اپنے مال اور اپنی جانیں دیں تو اللہ تعالیٰ اس کے بدلے میں انھیں اپنے فضل و کرم اور لطف و رحمت سے جنت عطا فرمائے گا، بندہ اپنا مال و دولت اور جان جو در حقیقت اللہ ہی کی عطا کردہ نعمتیں ہیں اسکی راہ میں خرچ کرتا ہے تو مالک الملک خوش ہوکر اس پر اپنا فضل و کرم کرتا ہے ۔ سبحان اللہ۔ کتنی حقیر چیز پر کس قدر گراں اور قیمتی چیز پروردگار اپنے بندے کو دیتا ہے۔ اللہ کا وعدہ سچا ہے: چونکہ جنت نقد نہیں ملتی بلکہ اُدھار ہے جو مرنے کے بعد ہی ملے گی۔ لہٰذا اللہ نے تمام الہامی کتابوں میں بالخصوص تورات، انجیل اور قرآن میں اسکی توثیق بھی فرمادی۔ اور یہ بھی فرمادیا کہ اللہ سے بڑھ کر اپنے وعدے کو پورا کرنے والا اور کون ہوسکتا ہے۔ نبی کریم صلی اللہ علیہ وسلم کا ارشاد ہے: جو شخص اللہ کی راہ میں جہاد کے لیے نکل کھڑا ہوتا ہے۔ رسولوں کی سچائی مان کر۔ پھر وہ فوت ہوجاتا ہے تو اللہ تعالیٰ اسے بہشت بریں لے جاتا ہے یا پورے پورے اجرا اور غنیمت کے ساتھ واپس لوٹاتا ہے۔ (بخاری: ۳۱۲۳) خوشیاں مناؤ: مطلب یہ کہ خوشی اُسی وقت منائی جاسکتی ہے جب مسلمانوں کو بھی یہ سودا منظو ہو۔ یعنی اللہ کی راہ میں جان و مال کی قربانی سے انھیں دریغ نہ ہو۔