سورة الانفال - آیت 54

كَدَأْبِ آلِ فِرْعَوْنَ ۙ وَالَّذِينَ مِن قَبْلِهِمْ ۚ كَذَّبُوا بِآيَاتِ رَبِّهِمْ فَأَهْلَكْنَاهُم بِذُنُوبِهِمْ وَأَغْرَقْنَا آلَ فِرْعَوْنَ ۚ وَكُلٌّ كَانُوا ظَالِمِينَ

ترجمہ ترجمان القرآن - مولانا ابوالکلام آزاد

جیسا کچھ دستور فرعون کے گروہ کا اور ان (سرکشوں) کا جو اس سے پہلے گزر چکے ہیں رہ چکا ہے وہی تمہارا ہوا۔ انہوں نے اپنے پروردگار کی نشانیاں جھٹلائیں تو ہم نے ان کے گناہوں کی پاداش میں انہیں ہلاک کر ڈالا۔ فرعون کا گروہ (سمندر میں) غرق کیا گیا تھا اور وہ سب ظلم کرنے والے تھے۔

تسہیل البیان فی تفسیر القرآن - ام عمران شکیلہ بنت میاں فضل حسین

یعنی ان کفار مکہ سے پہلے ہم نے آل فرعون اور دوسری اقوام پر انعامات کی بارش کی تھی۔ لیکن انھوں نے انعامات کی ناقدری کی۔ ان کی نیتوں میں بھی فتور آگیا، اللہ کی فرمانبرداری اور شکرادا کرنے کی بجائے وہ اس کی نافرمانی اور سرکشی پر اتر آئے تھے، لہٰذا ہم نے انھیں تباہ و برباد کر ڈالا اور آل فرعون کو تو ڈبوہی ڈالا اور اسکا نام و نشان تک ختم کر ڈالا۔ یہ سب ظالم تھے، اللہ نے ان پر کوئی ظلم نہیں کیا۔