سورة الاعراف

قَالَ يَا مُوسَىٰ إِنِّي اصْطَفَيْتُكَ عَلَى النَّاسِ بِرِسَالَاتِي وَبِكَلَامِي فَخُذْ مَا آتَيْتُكَ وَكُن مِّنَ الشَّاكِرِينَ

خدا نے کہا اے موسیٰ ! میں نے تجھے اپنی پیغمبری اور ہم کلامی سے لوگوں پر برگزیدگی بخشی، پس جو چیز تجھے عطا فرمائی ہے (یعنی احکام شریعت) اسے لے اور شکر بجا لا۔

یہ حضرت موسیٰ علیہ السلام سے ہم کلامی کا دوسرا موقعہ ہے ۔ اس سے پہلے جب حضرت موسیٰ علیہ السلام آگ لینے گئے تو اللہ تعالیٰ سے ہم کلام ہوئے تھے، اور پیغمبری عطا کی تھی، اللہ تعالیٰ فرماتے ہیں اگر دیدار نہیں ہوسکا، تو اور بہت سی نعمیتں اور فضیلتیں تمہیں عطا کی ہیں تمہیں اپنا رسول بنایا، ہم کلامی کا شرف بخشا، تمام جہان والوں میں سے منتخب کر لیا، لہذا اب میں جو شرعی احکام تمہیں دے رہا ہوں، ان پر اچھی طرح عمل کرنا، اور ان نعمتوں پر میرا شکرادا کرتے رہنا۔