سورة الاعراف - آیت 94

وَمَا أَرْسَلْنَا فِي قَرْيَةٍ مِّن نَّبِيٍّ إِلَّا أَخَذْنَا أَهْلَهَا بِالْبَأْسَاءِ وَالضَّرَّاءِ لَعَلَّهُمْ يَضَّرَّعُونَ

ترجمہ ترجمان القرآن - مولانا ابوالکلام آزاد

اور ہم نے جب کبھی کسی بستی میں کوئی نبی بھیجا تو ہمیشہ ایسا کیا کہ اس کے باشندوں کو سختیوں اور نقصانوں میں مبتلا کردیا کہ (سرکشی سے باز آئیں اور) عاجزی و نیاز مندی کریں۔

تسہیل البیان فی تفسیر القرآن - ام عمران شکیلہ بنت میاں فضل حسین

اللہ کا ضا بطہ دنیوی عذاب کا: اللہ تعالیٰ نے فر مایا ہے کہ جب بھی کوئی نبی کسی بستی کی طرف بھیجا جاتا ہے اور وہاں کے رہنے والے اُسکی دعوت سے انکار کرتے ہیں اور اسے جھٹلاتے ہیں، تو ہم ان منکرین پر ہلکے ہلکے عذاب بھیج دیتے ہیں،مثلاً قحط سالی، بیماری، وبا،معمولی قسم کے زلزلے یا سیلاب، فقیری، تنگی، مقصد یہ ہوتا ہے کہ لوگ اللہ کی طرف رجوع کریں ۔ اکڑنا چھوڑدیں اللہ کے آگے جھک جائیں، مصیبتوں کے ٹالنے کے لیے گڑ گڑاکر اللہ سے دعائیں کر یں اور اپنے نبی کی بات مان لیں۔