(ف ١) حضرت نوح (علیہ السلام) جہاں اللہ کے پیغمبر تھے ، وہاں ایک شفیق اور مہربان باپ بھی تھے ، اس لئے بیٹے کو اپنی آنکھوں کے سامنے ڈوبتا ہوا نہ دیکھ سکے ، شفقت پدری جوش میں آگئی ، الفاظ کا بہانہ ڈھونڈا اور اللہ سے درخواست کی کہ اے رب تونے وعدہ کیا تھا کہ تیرے اہل کو بچاؤں گا ، تیرا وعدہ سچا ہے میرا لڑکا بھی تو میرے اہل میں سے ہے ، پھر وہ کیوں کشتی میں نہیں بیٹھ سکتا ، دل میں اللہ کا ڈر بھی موجود ہے ، سفارش کے ساتھ یہ بھی کہے جاتے ہیں ، تو احکم الحاکمین ہے تو فیصلہ فرما دے ، اس میں تنقید کی گنجائش نہیں ۔ اللہ نے جواب دیا ، انبیاء کا مرتبہ صلبی درجوں سے بالا ہے ، اہل وہ نہیں جو تیرا عزیز ہے اہل وہ ہے جو مومن ہے ، جسے تیرے عقائد کے ساتھ محبت ہے ، بیٹے سے زیادہ کون عزیز ہو سکتا ہے ، اور نوح (علیہ السلام) سے زیادہ کون معزز ہے ، پھر جب نوح (علیہ السلام) کی اس باب میں نہیں سنی گئی ، اور اس کے حقیقی بیٹے کو بلحاظ عمل بیٹا قرار نہیں دیا گیا ، تو وہ لوگ جو مسلمان کہلاتے ہیں اور محض جھوٹی نسبتوں پر نازاں ہیں ، کس قدر بےوقوف ہیں ، وہ خدا کے آئین شرف ومجد سے آگاہ نہیں ، اللہ کے نزدیک ایک اچھے آدمی سے تعلقات اور رشتہ داریاں وجہ شفاعت نہیں ہو سکتیں ، نیک اعمال اور عقائد کی درستی ہی سے اللہ کا قرب حاصل کیا سکتا ہے ، حل لغات : انباء : جمع نبا ، خبر ۔