سورة سبأ - آیت 54

وَحِيلَ بَيْنَهُمْ وَبَيْنَ مَا يَشْتَهُونَ كَمَا فُعِلَ بِأَشْيَاعِهِم مِّن قَبْلُ ۚ إِنَّهُمْ كَانُوا فِي شَكٍّ مُّرِيبٍ

ترجمہ ترجمان القرآن - مولانا ابوالکلام آزاد

اس وقت ان کے اور ان کی خواہش کے درمیان روک کردی جائے گی جس طرح اس سے پہلے ان کے پیش روؤں کے ساتھ کیا گیا ہے بے شک یہ لوگ سخت شکوک وشبہات میں پڑے ہوئے تھے (١٣)۔

تفسیر السعدی - عبدالرحمٰن بن ناصر السعدی

﴿وَحِيلَ بَيْنَهُمْ وَبَيْنَ مَا يَشْتَهُونَ﴾ یعنی ان کے درمیان اور ان کی لذات و شہوات، مال و اولاد، ان کی فوجوں اور خدام و حشم کے درمیان رکاوٹیں حائل کردی جائیں گی۔ وہ اکیلے اکیلے اپنے اعمال کے ساتھ اسی طرح حاضر ہوں گے جس طرح انہیں اکیلے پیدا کیا گیا تھا اور جن چیزوں کے وہ مالک تھے انہیں اپنے پیچھے چھوڑ آئیں گے۔ ﴿كَمَا فُعِلَ بِأَشْيَاعِهِم﴾ ” جیسے ان جیسوں کے ساتھ کیا گیا تھا“ گزشتہ قوموں میں سے۔ جب ان پر ہلاکت خیز عذاب نازل ہوا تو ان کے اور ان کی دل پسند چیزوں کے درمیان رکاوٹیں حائل کردی گئیں۔ ﴿إِنَّهُمْ كَانُوا فِي شَكٍّ مُّرِيبٍ﴾ ” بے شک وہ بھی الجھن میں ڈالنے والے شک میں پڑے ہوئے تھے۔“ جو انہیں بدگمانی اور دلی قلق میں مبتلا کرتا تھا، اس لئے وہ ایمان نہ لائے اور جب ان سے توبہ کے لئے کہا گیا تو انہوں نے توبہ نہ کی۔