وَأَنَّ إِلَىٰ رَبِّكَ الْمُنتَهَىٰ
اور یہ کہ آخر کار تیرے رب کے پاس پہنچنا ہے
سب کی آخری منزل اللہ تعالٰی ادراک سے بلند ہے فرمان ہے کہ بازگشت آخر اللہ کی طرف ہے ۔ قیامت کے دن سب کو لوٹ کر اسی کے سامنے پیش ہونا ہے ۔ سیدنا معاذ رضی اللہ عنہ نے قبیلہ بنی اود میں خطبہ پڑھتے ہوئے فرمایا : ” اے بنی اود ! میں اللہ کے پیغمبر صلی اللہ علیہ وسلم کا قاصد بن کر تمہاری طرف آیا ہوں تم یقین کرو کہ تمہارا سب کا لوٹنا اللہ کی طرف ہے ، پھر یا تو جنت میں پہنچائے جاؤ یا جہنم میں دھکیلے جاؤ ۔ “ بغوی میں ہے { نبی کریم صلی اللہ علیہ وسلم نے اس آیت کی تفسیر میں فرمایا : ” اللہ تعالیٰ کی ذات میں فکر کرنا جائز نہیں “ } ۔ ۱؎ (بغوی فی التفسیر:232/4:ضعیف) جیسے اور حدیث میں ہے { مخلوق پر غور بھری نظریں ڈالو لیکن ذات خالق میں گہرے نہ اترو ، اسے عقل و ادراک فکر و ذہن نہیں پا سکتا ۔ } ۱؎ (بغوی فی التفسیر:232/4:ضعیف) گو ان لفظوں سے یہ حدیث محفوظ نہیں ، مگر صحیح حدیث میں یہ بھی مضمون موجود ہے ، اس میں ہے کہ { شیطان کسی کے پاس آتا ہے اور کہتا ہے اسے کس نے پیدا کیا ؟ پھر اسے کس نے پیدا کیا ؟ یہاں تک کہ کہتا ہے اللہ تعالیٰ کو کس نے پیدا کیا ؟ جب تم میں سے کسی کے دل میں یہ وسوسہ پیدا ہوا تو «اعُوذُ بِاللّہِ مِن الشِّیطانِ الرَّجِیمِ» پڑھ لے اور اس خیال کو دل سے دور کر دے ۔ } ۱؎ (صحیح بخاری:3276) سنن کی ایک حدیث میں ہے { مخلوقات اللہ میں غور و فکر کرو لیکن ذات اللہ میں غور و فکر نہ کرو ، سنو اللہ تعالیٰ نے ایک فرشتہ پیدا کیا ہے جس کے کان کی لو سے لے کر مونڈھے تک تین سو سال کا راستہ ہے او کما قال ۔ } ۱؎ (صحیح مسلم:134) پھر فرماتا ہے کہ بندوں میں ہنسنے رونے کا مادہ اور ان کے اسباب بھی اسی نے پیدا کئے ہیں جو بالکل مختلف ہیں وہی موت و حیات کا خالق ہے ۔ جیسے فرمایا «الَّذِی خَلَقَ الْمَوْتَ وَالْحَیَاۃَ» ۱؎ (67-الملک:2) ’ اس نے موت و حیات کو پیدا کیا اسی نے نطفہ سے ہر جاندار کو جوڑ جوڑ بنایا ‘ ۔