سورة الزمر - آیت 19

أَفَمَنْ حَقَّ عَلَيْهِ كَلِمَةُ الْعَذَابِ أَفَأَنتَ تُنقِذُ مَن فِي النَّارِ

ترجمہ ترجمان القرآن - مولانا ابوالکلام آزاد

بھلاجس شخص پر عذاب کا حکم ثابت ہوچکا تو کیا آپ اس شخص کو آگ سے بچاسکتے ہیں جو آگ میں گرچکا ہو؟

ابن کثیر - حافظ عماد الدین ابوالفداء ابن کثیر صاحب

نیک اعمال کے حامل لوگوں کے لئے محلات فرماتا ہے کہ ’ جس کی بدبختی لکھی جا چکی ہے تو اسے کوئی بھی راہ راست نہیں دکھا سکتا ، کون ہے جو اللہ کے گمراہ کئے ہوئے کو راہ راست دکھا سکے ؟ تجھ سے یہ نہیں ہو سکتا کہ تو ان کی رہبری کر کے انہیں اللہ کے عذاب سے بچا سکے ۔ ہاں نیک بخت نیک اعمال نیک عقدہ لوگ قیامت کے دن جنت کے محلات میں مزے کریں گے ، ان بالا خانوں میں جو کئی کئی منزلوں کے ہیں ، تمام سامان آرائش سے آراستہ ہیں وسیع اور بلند خوبصورت اور جگمگ کرتے ہیں ‘ ۔ نبی کریم صلی اللہ علیہ وسلم فرماتے ہیں { جنت میں ایسے محل ہیں جن کا اندرونی حصہ باہر سے اور بیرونی حصہ اندر سے صاف دکھائی دیتا ہے } ۔ ایک اعرابی نے پوچھا یا رسول اللہ صلی اللہ علیہ وسلم یہ کن کے لیے ہیں ؟ فرمایا : { ان کے لیے جو نرم کلامی کریں کھانا کھلائیں اور راتوں کو جب لوگ میٹھی نیند میں ہوں یہ اللہ کے سامنے کھڑے ہو کر گڑ گڑائیں ۔ نمازیں پڑھیں } ۔ ۱؎ (سنن ترمذی:2527،قال الشیخ الألبانی:حسن) مسند احمد میں فرمان رسول صلی اللہ علیہ وسلم ہے کہ { جنت میں ایسے بالاخانے ہیں جن کا ظاہر باطن سے اور باطن ظاہر سے نظر آتا ہے انہیں اللہ تعالیٰ نے ان کے لیے بنایا ہے جو کھانا کھلائیں کلام کو نرم رکھیں پے در پے نفل روزے بکثرت رکھیں اور پچھلی راتوں کو تہجد پڑھیں } ۔ ۱؎ (صحیح ابن خریمہ:2137:حسن) مسند کی اور حدیث میں ہے { جنتی جنت کے بالا خانوں کو اس طرح دیکھیں گے جیسے تم آسمان کے ستاروں کو دیکھتے ہو } اور روایت میں ہے { مشرقی مغربی کناروں کے ستارے جس طرح تمہیں دکھائی دیتے ہیں اسی طرح جنت کے وہ محلات تمہیں نظر آئیں گے } ۔ ۱؎ (صحیح بخاری:6556) اور حدیث میں ہے کہ { ان محلات کی یہ تعریفیں سن کر لوگوں نے کہا نبی کریم صلی اللہ علیہ وسلم یہ تو نبیوں کے لیے ہوں گے ؟ آپ صلی اللہ علیہ وسلم نے فرمایا : { ہاں ! اور ان کے لئے جو اللہ پر ایمان لائے اور رسولوں کو سچا جانے} } ۔ ۱؎ (سنن ترمذی:2556،قال الشیخ الألبانی:صحیح) مسند احمد میں ہے کہ { رسول اللہ صلی اللہ علیہ وسلم سے صحابہ رضی اللہ عنہم نے کہا یا رسول اللہ صلی اللہ علیہ وسلم جب تک ہم آپ صلی اللہ علیہ وسلم کی خدمت میں حاضر رہتے ہیں اور آپ صلی اللہ علیہ وسلم کے چہرے کو دیکھتے رہتے ہیں اس وقت تک تو ہمارے دل نرم رہتے ہیں اور ہم آخرت کی طرف ہمہ تن متوجہ ہو جاتے ہیں ۔ لیکن جب آپ کی مجلس سے اٹھ کر دنیوی کاروبار میں پھنس جاتے ہیں بال بچوں میں مشغول ہو جاتے ہیں تو اس وقت ہماری وہ حالت نہیں رہتی ۔ تو آپ صلی اللہ علیہ وسلم نے فرمایا : { اگر تم ہر وقت اسی حالت پر رہتے جو حالت تمہاری میرے سامنے ہوتی ہے تو فرشتے اپنے ہاتھوں سے تم سے مصافحہ کرتے اور تمہارے گھروں میں آ کر تم سے ملاقاتیں کرتے ۔ سنو اگر تم گناہ ہی نہ کرتے تو اللہ ایسے لوگوں کو لاتا جو گناہ کریں تاکہ اللہ تعالیٰ انہیں بخشے } ۔ ہم نے کہا نبی کریم صلی اللہ علیہ وسلم جنت کی بنیاد کس چیز کی ہے ؟ فرمایا : { ایک اینٹ سونے کی ایک چاندی کی ۔ اس کا چونا خالص مشک ہے اس کی کنکریاں لولو اور یاقوت ہیں ۔ اس کی مٹی زعفران ہے ۔ اس میں جو داخل ہو گیا وہ مالا مال ہو گیا ۔ جس کے بعد بے مال ہونے کا خطرہ ہی نہیں ۔ وہ ہمیشہ اس میں ہی رہے گا وہاں سے نکالے جانے کا امکان ہی نہیں ۔ نہ موت کا کھٹکا ہے ، ان کے کپڑے گلتے سڑتے نہیں ، ان کی جوانی دوامی ہے ۔ سنو ! تین شخصوں کی دعا مردود نہیں ہوتی عادل بادشاہ ، روزے دار اور مظلوم ۔ ان کی دعا ابر پر اٹھائی جاتی ہے اور اس کے لیے آسمان کے دروازے کھل جاتے ہیں اور اللہ رب العزت فرماتا ہے مجھے اپنی عزت کی قسم میں تیری ضرور مدد کروں گا اگرچہ کچھ مدت کے بعد ہو } } ۔ ۱؎ (سنن ترمذی:3598،قال الشیخ الألبانی:صحیح بالشواہد) ان محلات کے درمیان چشمے بہہ رہے ہیں اور وہ بھی ایسے کہ جہاں چاہیں پانی پہنچائیں جب اور جتنا چاہیں بہاؤ رہے ۔ یہ ہے اللہ تعالیٰ کا وعدہ اپنے مومن بندوں سے یقیناً اللہ تعالیٰ کی ذات وعدہ خلافی سے پاک ہے ۔