سورة مريم - آیت 8

قَالَ رَبِّ أَنَّىٰ يَكُونُ لِي غُلَامٌ وَكَانَتِ امْرَأَتِي عَاقِرًا وَقَدْ بَلَغْتُ مِنَ الْكِبَرِ عِتِيًّا

ترجمہ ترجمان القرآن - مولانا ابوالکلام آزاد

زکریا نے (متعجب ہوکر) کہا پروردگار ! میرے یہاں لڑکا کیسے ہوسکتا ہے، میری بیوی بانجھ ہوچکی ہے اور میرا بڑھایا دور تک پہنچ چکا۔

ابن کثیر - حافظ عماد الدین ابوالفداء ابن کثیر صاحب

بشارت قبولیت سن کر حضرت زکریا علیہ السلام اپنی دعا کی قبولیت اور اپنے ہاں لڑکا ہونے کی بشارت سن کر خوشی اور تعجب سے کیفیت دریافت کرنے لگے کہ بظاہر اسباب تو یہ امر مستبعد اور ناممکن معلوم ہوتا ہے ۔ دونوں جانب سے حالت محض ناامیدی کی ہے ۔ بیوی بانجھ جس سے اب تک اولاد نہیں ہوئی ، میں بوڑھا اور بے حد بوڑھا جس کی ہڈیوں میں اب تو گودا بھی نہیں رہا ، خشک ٹہنی جیسا ہو گیا ہوں ، گھر والی بھی بڑھیا پھوس ہو گئی ہے ، پھر ہمارے ہاں اولاد کیسے ہو گی ؟ غرض رب العالمین سے کیفیت بوجہ تعجب و خوشی دریافت کی ۔ سیدنا ابن عباس رضی اللہ عنہ سے روایت ہے کہ { میں تمام سنتوں کو جانتا ہوں لیکن مجھے یہ معلوم نہیں ہوا کہ نبی کریم صلی اللہ علیہ وسلم ظہر عصر میں پڑھتے تھے یا نہیں ؟ اور نہ یہ معلوم ہے کہ اس لفظ کو «عَتِیاً» پڑھتے تھے یا «عَسِیاً» } ۔ ۱؎ (سنن ابوداود:809،قال الشیخ الألبانی:صحیح) فرشتے نے جواب دیا کہ ” یہ تو وعدہ ہو چکا ، اسی حالت میں اسی بیوی سے تمہارے ہاں لڑکا ہو گا ۔ اللہ کے ذمے یہ کام مشکل نہیں ۔ اس سے زیادہ تعجب والا اور اس سے بڑی قدرت والا کام تو تم خود دیکھ چکے ہو اور وہ خود تمہارا وجود ہے ، جو کچھ نہ تھا اور اللہ تعالیٰ نے بنا دیا ۔ پس جو تمہاری پیدائش پر قادر تھا ، وہ تمہارے ہاں اولاد دینے پر بھی قادر ہے “ ۔ جیسے فرمان ہے «ہَلْ اَتٰی عَلَی الْاِنْسَانِ حِیْنٌ مِّنَ الدَّہْرِ لَمْ یَکُنْ شَیْـــًٔا مَّذْکُوْرًا» ۱؎ (76-الإنسان:1) یعنی ’ یقیناً انسان پر اس کے زمانے کا ایسا وقت بھی گزرا ہے ، جس میں وہ کوئی قابل ذکر چیز ہی نہ تھا ‘ ۔