سب کے سب میدان حشر میں اللہ تعالیٰ قیامت کی ہولناکیوں کا ذکر فرما رہا ہے اور جب تعجب خیز بڑے بڑے کام اس دن ہوں گے ، ان کا ذکر کر رہا ہے کہ «یَوْمَ تَمُورُ السَّمَاءُ مَوْرًا وَتَسِیرُ الْجِبَالُ سَیْرًا» ( 52-الطور : 9 ، 10 ) آسمان پھٹ جائے گا ، «وَتَرَی الْجِبَالَ تَحْسَبُہَا جَامِدَۃً وَہِیَ تَمُرٰ مَرَّ السَّحَابِ» ( 27-النمل : 88 ) پہاڑ اڑ جائیں گے گو تمہیں جمے ہوئے دکھائی دیتے ہیں لیکن اس دن تو بادلوں کی طرح تیزی سے چل رہے ہوں گے ۔ «وَتَکُونُ الْجِبَالُ کَالْعِہْنِ الْمَنفُوشِ» ( 101-القارعۃ : 5 ) آخر روئی کے گالوں کی طرح ہو جائیں گے ، «وَیَسْأَلُونَکَ عَنِ الْجِبَالِ فَقُلْ یَنسِفُہَا رَبِّی نَسْفًا فَیَذَرُہَا قَاعًا صَفْصَفًا لَّا تَرَیٰ فِیہَا عِوَجًا وَلَا أَمْتًا» ( 20-طٰہ : 105-107 ) زمین صاف چٹیل میدان ہو جائے گی جس میں کوئی اونچ نیچ تک باقی نہ رہے گی ، نہ اس میں کوئی مکان ہو گا نہ چھپر ۔ ساری مخلوق بغیر کسی آڑ کے اللہ کے بالکل سامنے ہو گی ۔ کوئی بھی مالک سے کسی جگہ چھپ نہ سکے گا ، کوئی جائے پناہ یا سر چھپانے کی جگہ نہ ہو گی ۔ کوئی درخت ، پتھر ، گھاس پھوس دکھائی نہ دے گا ۔ «قُلْ إِنَّ الْأَوَّلِینَ وَالْآخِرِینَ لَمَجْمُوعُونَ إِلَیٰ مِیقَاتِ یَوْمٍ مَّعْلُومٍ» ( 56-الواقعۃ : 50 ، 49 ) تمام اول و آخر کے لوگ جمع ہوں گے ، کوئی چھوٹا بڑا غیر حاضر نہ ہو گا ۔ تمام اگلے پچھلے اس مقرر دن جمع کئے جائیں گے ، «ذٰلِکَ یَوْمٌ مَّجْمُوعٌ لَّہُ النَّاسُ وَذٰلِکَ یَوْمٌ مَّشْہُودٌ» ( 11-ھود : 103 ) اس دن سب لوگ حاضر شدہ ہوں گے اور سب موجود ہوں گے ۔ «یَوْمَ یَقُومُ الرٰوحُ وَالْمَلَائِکَۃُ صَفًّا لَّا یَتَکَلَّمُونَ إِلَّا مَنْ أَذِنَ لَہُ الرَّحْمٰنُ وَقَالَ صَوَابًا» ( 78-النبإ : 38 ) تمام لوگ اللہ کے سامنے صف بستہ پیش ہوں گے ، روح اور فرشتے صفیں باندھے ہوئے کھڑے ہوں گے ، کسی کو بات کرنے کی بھی تاب نہ ہو گی بجز ان کے جنہیں اللہ رحمان اجازت دے اور وہ بات بھی معقول کہیں ۔ پس یا تو سب کی ایک ہی صف ہو گی یا کئی صفوں میں ہوں گے ۔ جیسے ارشاد قرآن ہے «وَجَاءَ رَبٰکَ وَالْمَلَکُ صَفًّا صَفًّا» ( 89-الفجر : 22 ) تیرا رب آئے گا اور فرشتے صف بہ صف ۔ وہاں منکرین قیامت کو سب کے سامنے ڈانٹ ڈپٹ ہو گی کہ دیکھو جس طرح ہم نے تمہیں اول بار پیدا کیا تھا ، اسی طرح دوسری بار پیدا کر کے اپنے سامنے کھڑا کر لیا ، اس سے پہلے تو تم اس کے قائل نہ تھے ۔ نامہ اعمال سامنے کر دیئے جائیں گے جس میں ہر چھوٹا بڑا ، کھلا چھپا عمل لکھا ہوا ہو گا ۔ اپنی بد اعمالیوں کو دیکھ دیکھ کر گناہ گار خوف و حیرت زدہ ہو جائیں گے اور افسوس و رنج سے کہیں گے کہ ہائے ہم نے اپنی عمر کیسی غفلت میں بسر کی ، افسوس بد کرداریوں میں لگے رہے اور دیکھو تو اس کتاب نے ایک معاملہ بھی ایسا نہیں چھوڑا جسے لکھا نہ ہو ، چھوٹے بڑے تمام گناہ اس میں لکھے ہوئے ہیں ۔ طبرانی میں ہے کہ غزوہ حنین سے فارغ ہو کر ہم چلے ، ایک میدان میں منزل کی ۔ اللہ کے رسول صلی اللہ علیہ وسلم نے ہم سے فرمایا جاؤ جسے کوئی لکڑی ، کوئی کوڑا ، کوئی گھاس پھوس مل جائے لے آؤ ۔ ہم سب ادھر ادھر ہو گئے چپٹیاں ، چھال ، لکڑی ، پتے ، کانٹے ، درخت ، جھاڑ ، جھنکار جو ملا لے آئے ۔ ڈھیر لگ گیا تو آپ صلی اللہ علیہ وسلم نے فرمایا دیکھ رہے ہو ؟ اسی طرح گناہ جمع ہو کر ڈھیر لگ جاتا ہے ، اللہ سے ڈرتے رہو ، چھوٹے بڑے گناہوں سے بچو کیونکہ سب لکھے جا رہے ہیں اور شمار کئے جا رہے ہیں ۔ (طبرانی کبیر:5485:ضعیف) جو خیر و شر ، بھلائی برائی جس کسی نے کی ہو گی ، اسے موجود پائے گا جیسے آیت «یَوْمَ تَجِدُ کُلٰ نَفْسٍ مَّا عَمِلَتْ مِنْ خَیْرٍ مٰحْضَرًا» ( 3- آل عمران : 30 ) اور آیت «یُنَبَّؤُا الْاِنْسَانُ یَوْمَیِٕذٍ بِمَا قَدَّمَ وَاَخَّرَ» ( 75- القیامۃ : 13 ) اور آیت «یَوْمَ تُبْلَی السَّرَایِٕرُ» ( 86- الطارق : 9 ) الخ میں ہے ، تمام چھپی ہوئی باتیں ظاہر ہو جائیں گی ۔ رسول اللہ صلی اللہ علیہ وسلم فرماتے ہیں ، ہر بدعہد کے لیے قیامت کے دن ایک جھنڈا ہو گا اس کی بدعہدی کے مطابق جس سے اس کی پہچان ہو جائے ۔ (صحیح بخاری:3187) اور حدیث میں ہے کہ یہ جھنڈا اس کی رانوں کے پاس ہو گا اور اعلان ہو گا کہ یہ فلاں بن فلاں کی بدعہدی ہے ۔ (صحیح بخاری:3186) تیرا رب ایسا نہیں کہ مخلوق میں سے کسی پر بھی ظلم کرے ، ہاں البتہ درگزر کرنا ، معاف فرما دینا ، عفو کرنا ، یہ اس کی صفت ہے ۔ ہاں بدکاروں کو اپنی قدرت و حکمت اور عدل و انصاف سے وہ سزا بھی دیتا ہے ۔ جہنم گنہگاروں اور نافرمانوں سے بھر جائے پھر کافروں اور مشرکوں کے سوا اور مومن گنہگار چھوٹ جائیں گے ۔ اللہ تعالیٰ ایک ذرے کے برابر بھی ناانصافی نہیں کرتا ، نیکیوں کو بڑھاتا ہے ، گناہوں کو برابر ہی رکھتا ہے ۔ عدل کا ترازو اس دن سامنے ہو گا کسی کے ساتھ کوئی بدسلوکی نہ ہو گی ، الخ ۔ مسند احمد میں ہے ، سیدنا جابر بن عبداللہ رضی اللہ عنہما فرماتے ہیں ، مجھے روایت پہنچی کہ ایک شخص نے نبی کریم صلی اللہ علیہ وسلم سے ایک حدیث سنی ہے جو وہ بیان کرتے ہیں ۔ میں نے اس حدیث کو خاص ان سے سننے کے لیے ایک اونٹ خریدا ، سامان کس کر سفر کیا ، مہینہ بھر کے بعد شام میں ان کے پاس پہنچا تو معلوم ہوا کہ وہ عبداللہ بن انیس رضی اللہ عنہما ہیں ۔ میں نے دربان سے کہا جاؤ خبر کرو کہ جابر رضی اللہ عنہ دروازے پر ہے ، انہوں نے پوچھا کیا جابر بن عبداللہ رضی اللہ عنہما ؟ میں نے کہا جی ہاں ۔ یہ سنتے ہی جلدی کے مارے چادر سنبھالتے ہوئے جھٹ سے باہر آ گئے اور مجھے لپٹ گئے ۔ معانقہ سے فارغ ہو کر میں نے کہا ، مجھے یہ روایت پہنچی کہ آپ نے قصاص کے بارے میں کوئی حدیث رسول اللہ صلی اللہ علیہ وسلم سے سنی ہے تو میں نے چاہا کہ خود آپ سے میں وہ حدیث سن لوں ، اس لیے یہاں آیا اور سنتے ہی سفر شروع کر دیا ، اس خوف سے کہ کہیں اس حدیث کے سننے سے پہلے مر نہ جاؤں یا آپ کو موت نہ آ جائے ۔ اب آپ سنائیے وہ حدیث کیا ہے ؟ آپ رضی اللہ عنہ نے فرمایا ، میں نے رسول اللہ صلی اللہ علیہ وسلم سے سنا ہے کہ اللہ عز و جل قیامت کے دن اپنے تمام بندوں کا اپنے سامنے حشر کرے گا ، ننگے بدن ، بے ختنہ ، بےسر و سامان ۔ پھر انہیں ندا کرے گا جسے دور نزدیک والے سب یکساں سنیں گے ، فرمائے گا کہ میں مالک ہوں ، میں بدلے دلوانے والا ہوں ۔ کوئی جہنمی اس وقت تک جہنم میں نہ جائے گا جب تک اس کا جو حق کسی جنتی کے ذمہ ہو میں نہ دلوا دوں اور نہ کوئی جنتی جنت میں داخل ہو سکتا ہے جب تک اس کا حق جو جہنمی پر ہے میں نہ دلوا دوں گو ایک تھپڑ ہی ہو ۔ ہم نے کہا نبی کریم صلی اللہ علیہ وسلم یہ حق کیسے دلوائے جائیں گے حالانکہ ہم سب تو وہاں ننگے پاؤں ، ننگے بدن ، بے مال و اسباب ہوں گے ۔ آپ صلی اللہ علیہ وسلم نے فرمایا ہاں اس دن حق نیکیوں اور برائیوں سے ادا کئے جائیں گے ۔ (مسند احمد:495/3:حسن) اور حدیث میں ہے کہ نبی کریم صلی اللہ علیہ وسلم نے فرمایا ہے کہ بےسینگ والی بکری کو اگر سینگ دار بکری نے مارا ہے تو اس سے بھی اس کو بدلہ دلوایا جائے گا ۔ (صحیح مسلم:2582(21-الأنبیاء:47)) اس کے اور بھی بہت سے شواہد ہیں جنہیں ہم نے بالتفصیل آیت «وَنَضَعُ الْمَوَازِیْنَ الْقِسْطَ لِیَوْمِ الْقِیٰمَۃِ فَلَا تُظْلَمُ نَفْسٌ شَـیْــــــًٔا» ( 21- الأنبیاء : 47 ) الخ کی تفسیر میں اور آیت «اِلَّآ اُمَمٌ اَمْثَالُکُمْ مَا فَرَّطْنَا فِی الْکِتٰبِ مِنْ شَیْءٍ ثُمَّ اِلٰی رَبِّہِمْ یُحْشَرُوْنَ» ( 6- الانعام : 38 ) الخ کی تفسیر میں بیان کئے ہیں ۔