سورة الرحمن

وَيَبْقَىٰ وَجْهُ رَبِّكَ ذُو الْجَلَالِ وَالْإِكْرَامِ

اور تیرے رب کی ذات باقی رہ جائیگی ۔ یہی بزرگی اور عظمت (ف 2) والی ہے

وَ يَبْقٰى وَجْهُ رَبِّكَ ذُو الْجَلٰلِ وَ الْاِكْرَامِ: ’’ الْجَلٰلِ ‘‘ کا معنی عظمت و کبریائی ہے اور ’’ الْاِكْرَامِ ‘‘ ’’أَكْرَمَ يُكْرِمُ ‘‘ (افعال) کا مصدر ہے۔ اللہ تعالیٰ کے ’’ذُوالإِْكْرَامِ‘‘ ہونے کا ایک مطلب یہ ہے کہ عزت دینے والا وہی ہے، کوئی اور نہیں، جیسے فرمایا : ﴿وَ مَنْ يُّهِنِ اللّٰهُ فَمَا لَهٗ مِنْ مُّكْرِمٍ ﴾ [ الحج : ۱۸ ] ’’اور جسے اللہ ذلیل کر دے پھر اسے کوئی عزت دینے والا نہیں۔‘‘ اور دوسرا مطلب یہ ہے کہ اس کا حق ہے کہ اس کا اکرام کیا جائے، اس کے بندے اس کی توحید و تسبیح اور عبادت کے ساتھ اس کا اکرام کرتے ہیں۔