سورة الفجر - آیت 4

وَاللَّيْلِ إِذَا يَسْرِ

ترجمہ سراج البیان - مستفاد از ترجمتین شاہ عبدالقادر دھلوی/شاہ رفیع الدین دھلوی

اور رات کی جب گزرنے لگے (حاجی) میدان مزدلفہ میں۔

تفسیرتیسیرارحمٰن - محمد لقمان سلفی

(4)چوتھی چیز ” رات“ ہے، جس کی اللہ تعالیٰ نے یہاں قسم کھائی ہے، جو چلتی رہتی ہے یہاں تک کہ گذر جاتی ہے اور پھر لوٹ کر آتی ہے۔ رات اور دن کی یہ گردش اللہ تعالیٰ کے کمال قدرت پردلالت کرتی ہے اور بندوں کو ان عظیم نعمتوں کی یاد دلاتی ہے جو اس گردش سے پیدا ہوتی ہیں۔ مثلاً دن میں آدمی تلاش معاش میں سرگرداں رہتا ہے اور جب رات آتی ہے تو نیند کی گود میں چلا جاتا ہے اور اس کی ساری تھکان دور ہوجاتی ہے۔ مفسرین نے لکھا ہے کہ مذکورہ بالا قسموں کا جواب قسم محذوف ہے، یعنی مذکورہ بالا چیزوں کی قسم ! اللہ تعالیٰ قیامت کے دن ضرور ہر ایک کو اس کے عمل کا بدلہ دے گا۔