سورة المنافقون - آیت 9

يَا أَيُّهَا الَّذِينَ آمَنُوا لَا تُلْهِكُمْ أَمْوَالُكُمْ وَلَا أَوْلَادُكُمْ عَن ذِكْرِ اللَّهِ ۚ وَمَن يَفْعَلْ ذَٰلِكَ فَأُولَٰئِكَ هُمُ الْخَاسِرُونَ

ترجمہ سراج البیان - مستفاد از ترجمتین شاہ عبدالقادر دھلوی/شاہ رفیع الدین دھلوی

مومنو ! تمہارے مال اور تمہاری اولاد تم کو اللہ کی یاد سے غافل نہ کریں اور جس نے یہ کیا ۔ تو وہی لوگ زیاں کار ہیں۔

تفسیرتیسیرارحمٰن - محمد لقمان سلفی

(9) گزشتہ آیتوں میں منافقین کے ان برے عادات و خصائل کا ذکر ہوا جن کے نتیجے میں وہ لوگ اللہ کی یاد سے غافل ہوگئے تھے اور اب مؤمنوں سے کہا جا رہا ہے کہ دیکھو تم ان کی طرح نہ ہوجاؤ اور اپنے مال و دولت اور اولاد کی اندھی محبت میں اس طرح نہ کھو جاؤ کہ اللہ کی یاد سے غافل ہوجاؤ، جو دنیا و آخرت میں ہر خسران ہلاکت کا سبب اول ہے۔