قُل لِّلْمُخَلَّفِينَ مِنَ الْأَعْرَابِ سَتُدْعَوْنَ إِلَىٰ قَوْمٍ أُولِي بَأْسٍ شَدِيدٍ تُقَاتِلُونَهُمْ أَوْ يُسْلِمُونَ ۖ فَإِن تُطِيعُوا يُؤْتِكُمُ اللَّهُ أَجْرًا حَسَنًا ۖ وَإِن تَتَوَلَّوْا كَمَا تَوَلَّيْتُم مِّن قَبْلُ يُعَذِّبْكُمْ عَذَابًا أَلِيمًا
گنواروں میں سے جو لوگ (سفر حدیبیہ سے) پیچھے رہ گئے تھے ان سے کہہ دے کہ تم عنقریب سخت جنگ آور لوگوں کی طرف بلائے جاؤ گے تم ان سے لڑو گے یا وہ مسلمان ہوجائیں گے پس اگر تم اطاعت کروگے تو اللہ تمہیں اچھا اجر دیگا اور الر تم پلٹ گئے جیسے پہلے پلٹے تھے تو اللہ تمہیں دردناک عذاب دیگا
(10) اللہ تعالیٰ نے نبی کریم (ﷺ) کی زبانی عمرہ حدیبیہ سے پیچھے رہ جانے والے دیہاتیوں سے کہا کہ عنقریب تمہیں ایک زبردست طاقتور قوم سے جنگ کرنے کے لئے بلایا جائے گا، اس طاقتور قوم کی تعیین میں علمائے تفسیر کے کئی اقوال ہیں، کسی نے فارس، کسی نے روم، کسی نے دونوں، کسی نے ہوازن و ثقیف، اور کسی نے مسلیمہ کذاب کے ماننے والوں کو مراد لیا ہے۔ واحدی نے اکثر مفسرین سے آخری قول نقل کیا ہے، اس لئے کہ یہاں دوہی صورت بتائی گئی ہے، یا تو وہ لوگ اسلام لائیں گے، یا ان کا فیصلہ تلوار کرے گی، ان سے جزیہ نہیں لیا جائے گا اور مسلیمہ کذاب کے ماننے والے ہی وہ لوگ تھے جن سے جزیہ لینا جائز نہیں تھا، اہل فارس اور اہل روم سے تو جزیہ لیا جاسکتا تھا اس لئے کہ وہ لوگ اسلام لانے کے بعد مرتد نہیں ہوئے تھے۔ اللہ تعالیٰ نے ان سے فرمایا کہ تم ان سے قتال کرو گے، الایہ کہ وہ اسلام قبول کرلیں اگر تم اس دعوت جہاد پر لبیک کہو گے اور ان سے قتال کرو گے، تو اللہ تعالیٰ تمہیں دنیا میں مال غنیمت اور آخرت میں جنت دے گا اور اگر عمرہ حدیبیہ کی طرح اس بار بھی تم جہاد کے لئے جانے سے کتراؤ گے، تو وہ تمہیں درد ناک عذاب دے گا۔