سورة غافر - آیت 16

يَوْمَ هُم بَارِزُونَ ۖ لَا يَخْفَىٰ عَلَى اللَّهِ مِنْهُمْ شَيْءٌ ۚ لِّمَنِ الْمُلْكُ الْيَوْمَ ۖ لِلَّهِ الْوَاحِدِ الْقَهَّارِ

ترجمہ سراج البیان - مستفاد از ترجمتین شاہ عبدالقادر دھلوی/شاہ رفیع الدین دھلوی

جس دن کہ وہ نکل کھڑے ہونگے اللہ پر ان کی کوئی شئے پوشیدہ نہ رہیگی اس دن کس کی بادشاہت ہوگی ؟ اللہ کی جو اکیلا ہے دباؤ والا۔

تفسیرتیسیرارحمٰن - محمد لقمان سلفی

جس دن تمام لوگ اپنی قبروں سے نکل پڑیں گے، کوئی چیز انہیں اللہ سے نہیں چھپائے گی، جب تمام مخلوقات کی روحیں قبض کرلی جائیں گی، اللہ کے سوا کوئی باقی نہیں رہے گا، اس وقت اللہ تعالیٰ تین بار کہے گا : آج بادشاہت کس کی ہے؟ پھر خود ہی جواب دے گا، اس اللہ کی ہے جو تنہا ہے اور جو ہر چیز پر قاہر و غالب ہے۔ بخاری و مسلم نے اسی معنی کی حدیث عبداللہ بن عمر (رض) سے روایت کی ہے۔