سورة ھود - آیت 2

أَلَّا تَعْبُدُوا إِلَّا اللَّهَ ۚ إِنَّنِي لَكُم مِّنْهُ نَذِيرٌ وَبَشِيرٌ

ترجمہ سراج البیان - مستفاد از ترجمتین شاہ عبدالقادر دھلوی/شاہ رفیع الدین دھلوی

کہ تم اللہ کے سوا کسی کو نہ پوجو ، میں تمہارے لیے اس کی طرف سے ڈرانے والا ‘ اور بشارت دینے والا ہوں ۔

تفسیرتیسیرارحمٰن - محمد لقمان سلفی

(2) زمخشری نے کہا ہے کہ İأَلَّا تَعْبُدُواĬ فصلت فعل کا مفعول لہ ہے اور معنی یہ ہوگا کہ قرآن کریم میں موجود احکام اور دیگر امور کو تفصیل کے ساتھ اس لیے بیان کردیا گیا ہے کہ تاکہ تم اللہ کے علاوہ کسی اور کی عبادت نہ کرو، ایک قول یہ بھی ہے کہ یہ پہلی آیت سے الگ نبی کریم (ﷺ) کی زبانی ایک مستقل کلام ہے، ایسی صورت میں معنی یہ ہوگا کہ نبی کریم (ﷺ) نے کفار قریش سے کہا کہ اللہ کے علاوہ کسی کی عبادت نہ کرو اور یہ میں اللہ کی جانب سے تمہیں عذاب نار سے ڈرانے والا اور جنت کی خوشخبری دینے والا ہوں۔