سورة الممتحنة - آیت 13

يَا أَيُّهَا الَّذِينَ آمَنُوا لَا تَتَوَلَّوْا قَوْمًا غَضِبَ اللَّهُ عَلَيْهِمْ قَدْ يَئِسُوا مِنَ الْآخِرَةِ كَمَا يَئِسَ الْكُفَّارُ مِنْ أَصْحَابِ الْقُبُورِ

ترجمہ سراج البیان - مولانا حنیف ندوی

مومنو ! ان لوگوں سے دوستی نہ رکھو ۔ جن پر اللہ کا غصہ ہوا ہے ۔ یہ لوگ آخرت سے ناامید ہیں ۔ جیسے کہ (اب) کافر اہل قبور کی طرف سے ناامید ہیں

تسہیل البیان فی تفسیر القرآن - ام عمران شکیلہ بنت میاں فضل حسین

اصحاب قبور سے كافروں كی مایوسی كی مختلف توجیہات: اس جملہ كے دو مختلف مطلب صحابہ کرام رضی اللہ عنہم سے منقول ہیں ایك یہ كہ كافروں كا نہ آخرت پر ایمان ہے نہ ہی قبروں سے مردوں كے دوبارہ جی اٹھنے كا، وہ آخرت میں جزا و سزائے اعمال كی ویسے ہی توقع نہیں ركھتے جیسے مردوں كے قبروں سے جی اٹھنے كی توقع نہیں ركھتے۔ دوسرا مطلب یہ ہے جو كافر قبروں میں پہنچ چكے ہیں حقیقت حال ان كے سامنے كھل كر آچكی ہے۔ اور آخرت میں اللہ كی رحمت اور مہربانی سے ایسے ہی مایوس ہو چكے ہیں۔ جیسے كہ یہ كافر آخرت كے قیام سے ہی مایوس ہیں۔ دونوں مطلب درست ہیں۔ الحمد للہ سورئہ الممتحنہ كی تفسیر مكمل ہوئی۔