سورة آل عمران - آیت 186

لَتُبْلَوُنَّ فِي أَمْوَالِكُمْ وَأَنفُسِكُمْ وَلَتَسْمَعُنَّ مِنَ الَّذِينَ أُوتُوا الْكِتَابَ مِن قَبْلِكُمْ وَمِنَ الَّذِينَ أَشْرَكُوا أَذًى كَثِيرًا ۚ وَإِن تَصْبِرُوا وَتَتَّقُوا فَإِنَّ ذَٰلِكَ مِنْ عَزْمِ الْأُمُورِ

ترجمہ سراج البیان - مولانا حنیف ندوی

تم اپنے مالوں میں اور اپنی جانوں میں آزمائے جاؤ گے ۔ اور تم ضرور اہل کتاب سے اور مشرکین سے ایذا کی بہت سی باتیں سنو گے ، اور اگر تم صبر کرو اور پرہیزگار رہو تو یہ ہمت کے کاموں میں سے ہے (ف ٢)

تسہیل البیان فی تفسیر القرآن - ام عمران شکیلہ بنت میاں فضل حسین

مال و جان سے آزمائش ضرور آئے گی، تمہیں تکلیف دہ باتیں سننا ہونگی، سننے میں بھی آزمائش ہے۔ کبھی خوشی کبھی دکھ ملتا ہے ۔ تم برداشت کرو یہ اس راستے کا حصہ ہیں ۔ تقویٰ اور صبر سے کام لو، ہر آزمائش انسان کو نکھارتی ہے، مشکل حالات میں چھپی ہوئی قوتیں سامنے آتی ہیں۔ جو چیزیں انسان آسائش میں یاد نہیں رکھتا وہ مصیبت یادکروادیتی ہے۔ جنت کا راستہ مشکلات کا راستہ ہے۔ خواہشات نفس کو چھوڑنا پڑتا ہے۔ آزمائش دعوت حق کی سنت ہے۔ شعر تندی باد مخالف سے نہ گھبرا اے عقاب یہ تو چلتی ہے تجھے اونچا اُڑانے کیلئے [اقبال] اس آیت میں آزمائش کے فوائد بتاکر مسلمانوں کو اسلام کی راہ میں پیش آنے والی مشکلات کے لیے تیار کیا جارہا ہے۔ جس سے ابتداء سے صبر و استقامت کی عادت پیدا ہوتی ہے۔ اخلاقی کمزوریوں کا علاج ہوتا ہے۔ درجات بلند ہوتے ہیں۔ مومن اور منافق پہچانے جاتے ہیں۔ یہود اور مشرکین کے ہاتھوں دور نبوی صلی اللہ علیہ وسلم میں ہجرت سے پہلے بھی اور بعد میں بھی مسلمانوں کی اور آپ کی زندگی بھی انہی لوگوں سے دکھ اٹھاتے گزری۔ اور مسلمانوں کو یہ خبراس لیے دی جارہی ہے کہ ذہنی طور پر مسلمان ان تکلیفوں کو برداشت کرنے کے لیے تیار رہیں۔