پھر اللہ تعالیٰ انہیں ڈرا رہا ہے کہ ہدایت اور بھلائی کو جھوٹ جاننے والے، کلام اللہ اور کلام رسول کے منکر اپنا انجام ابھی دیکھ لیں گے جب کہ گردنوں میں طوق اور زنجیریں پڑی ہوئی ہوں گی۔ اور داروغہ جہنم گھسیٹے گھسیٹے پھر رہے ہوں گے جب اہل دوزخ مشرکوں کو پیاس لگے گی تو فرشتے ان کو گھسیٹتے ہوئے ایسے مقام پر لے جائیں گے جہاں گرم پانی کے چشمے اُبل رہے ہوں گے۔ انھیں وہاں سے گرم پانی پلانے کے بعد پھر اپنے اصل مقام پر لا کر دوزخ میں جھونک دیا جائے گا۔