سورة غافر - آیت 65

هُوَ الْحَيُّ لَا إِلَٰهَ إِلَّا هُوَ فَادْعُوهُ مُخْلِصِينَ لَهُ الدِّينَ ۗ الْحَمْدُ لِلَّهِ رَبِّ الْعَالَمِينَ

ترجمہ سراج البیان - مولانا حنیف ندوی

وہ زندہ ہے اس کے سوا کوئی معبود نہیں ۔ سو نری (ف 2) اس کی عبادت کرکے اس کو پکارو ۔ سب تعریف اللہ کے لئے ہے جو سارے جہان کا رب ہے

تسہیل البیان فی تفسیر القرآن - ام عمران شکیلہ بنت میاں فضل حسین

اللہ تعالیٰ ازل سے ہے اور ابد تک رہے گا وہ زندہ ہے جس پر کبھی موت نہیں وہی اول وہی آخر، وہی ظاہر وہی باطن ہے۔ اس کاکوئی وصف کسی دوسرے میں نہیں۔ اس کا نظیر یا برابر کوئی نہیں۔ لہٰذا تمہیں چاہیے کہ اس کی توحید کو مانتے ہوئے اس سے دعائیں کرتے رہو۔ تمام تر تعریفوں کا مالک وہی ہے۔ امام ابن جریر رحمہ اللہ فرماتے ہیں اہل علم کی ایک جماعت سے منقول ہے کہ لَا اِلٰہَ اِلاَّ اللّٰہُ پڑھنے والے کو ساتھ ہی اَلْحَمْدُ لِلّٰہِ رَبِّ الْعٰلَمِیْنَ بھی پڑھنا چاہیے تاکہ اس آیت پر عمل ہو جائے ابن عباس سے بھی یہ مروی ہے (حاکم ۲/۴۳۸) حاکم اور ذھبی نے اسے صحیح کہا ہے۔