وَجَعَلْنَا ابْنَ مَرْيَمَ وَأُمَّهُ آيَةً وَآوَيْنَاهُمَا إِلَىٰ رَبْوَةٍ ذَاتِ قَرَارٍ وَمَعِينٍ
اور ہم نے مریم (علیہا السلام) کے بیٹے اور اس کی ماں کو ایک نشانی بنایا ، اور ان دونوں کو ایک ٹیلے پر جہاں ٹھہراؤ اور نتھرا پانی تھا ، جگہ دی ۔
حضرت عیسیٰ علیہ السلام اور مریم کو اللہ نے اپنی قدرت کاملہ کے اظہار کی ایک زبردست نشانی بنایا۔ آدم کو مرد اور عورت کے بغیر پیدا کیا۔ اماں حوا کو صرف مرد سے بغیر عورت کے پیدا کیا۔ حضرت عیسیٰ علیہ السلام کو صرف عورت سے بغیر مرد کے پیدا کیا۔ بقیہ تمام انسانوں کو مرد اور عورت سے پیدا کیا۔ ربوہ سے مراد: بلند زمین جو سر سبز اور پیداوار کے قابل ہو۔ (تفسیر طبری) چشمۂ جاری سے مراد: وہ چشمہ ہے جو ایک قول کے مطابق ولادت عیسیٰ علیہ السلام کے وقت اللہ تعالیٰ نے بطور خرق عادت، حضرت مریم کے پیروں کے نیچے سے جاری فرمایا تھا۔ جیسا کہ سورت مریم میں مذکور ہے۔