سورة طه - آیت 61
قَالَ لَهُم مُّوسَىٰ وَيْلَكُمْ لَا تَفْتَرُوا عَلَى اللَّهِ كَذِبًا فَيُسْحِتَكُم بِعَذَابٍ ۖ وَقَدْ خَابَ مَنِ افْتَرَىٰ
ترجمہ سراج البیان - مولانا حنیف ندوی
موسی نے ان سے کہا کمبختی تمہاری خدا پر جھوٹ نہ باندھو ، کہیں ایسا نہ ہو کہ وہ تمہیں عذاب کے ساتھ ہلاک کرے ، اور جس نے جھوٹ باندھا ، وہ نامراد ہوا ۔
تسہیل البیان فی تفسیر القرآن - ام عمران شکیلہ بنت میاں فضل حسین
مقابلے سے پہلے موسیٰ علیہ السلام کی فرعونیوں کو تنبیہ: موسیٰ علیہ السلام نے اکابرین قوم فرعون کومخاطب کرتے ہوئے ایک بار پھر تنبیہ کی اور فرمایا: اب بھی سمجھ جاؤ اور معجزہ کو جادو نہ بتاؤ۔ جبکہ تم حقیقت کو پوری طرح سمجھ چکے ہو، اس لیے دوسروں کی آنکھوں میں دھول نہ ڈالو۔ اور جو شخص حق کو سمجھ لینے کے بعد اس کا انکار کرے گا۔ وہ عذاب الٰہی سے دو چار ہوگا۔