فَلَمَّا اعْتَزَلَهُمْ وَمَا يَعْبُدُونَ مِن دُونِ اللَّهِ وَهَبْنَا لَهُ إِسْحَاقَ وَيَعْقُوبَ ۖ وَكُلًّا جَعَلْنَا نَبِيًّا
پھر جب وہ ان سے اور اللہ کے سوا ان کے معبودوں کو جنہیں وہ پکارتے تھے یک سو ہوا تو ہم نے اسے اسحاق (علیہ السلام) اور یعقوب (علیہ السلام) بخشا ، اور ہر ایک کو ہم نے نبی بنا یا (ف ٢) ۔
ہجرت کے بعد اللہ کا ابراہیم علیہ السلام کو اولاد عطا فرمانا: جب آپ نے اللہ کی راہ میں اپنے ماں باپ، قوم کنبے، گھر بار کو قربان کر دیا۔ سب سے یک طرف ہو گئے اور ان سے اپنی برأت اور علیحدگی کا اعلان کر دیا تو اللہ نے ان کی نسل جاری کر دی آپ کے ہاں حضرت اسحاق علیہ السلام پیدا ہوئے اور حضرت اسحق علیہ السلام کے ہاں یعقوب علیہ السلام پیدا ہوئے تاکہ غریب الوطنی کی وحشت دور ہو اور انس و سکون حاصل کریں۔ اولاد بھی ایسی جو سب نبی تھے۔ سیدنا اسحاق ان کے بیٹے سیدنا یعقوب بھی نبی تھے پھر انھی کی اولاد سے یعنی بنی اسرائیل میں سیکڑوں نبی پیدا ہوئے۔