سورة الرعد - آیت 41

أَوَلَمْ يَرَوْا أَنَّا نَأْتِي الْأَرْضَ نَنقُصُهَا مِنْ أَطْرَافِهَا ۚ وَاللَّهُ يَحْكُمُ لَا مُعَقِّبَ لِحُكْمِهِ ۚ وَهُوَ سَرِيعُ الْحِسَابِ

ترجمہ سراج البیان - مستفاد از ترجمتین شاہ عبدالقادر دھلوی/شاہ رفیع الدین دھلوی

کیا وہ نہیں دیکھتے کہ ہم زمین ( عرب) کو اس کے اطراف سے گھٹاتے چلے آتے ہیں ۔ اور اللہ حکم کرتا ہے اور کوئی اس کے حکم کو پیچھے ہٹانے والا نہیں اور وہ جلد حساب لینے والا ہے ۔(ف ٣)

تسہیل البیان فی تفسیر القرآن - ام عمران شکیلہ بنت میاں فضل حسین

یعنی عرب کی زمین مشرکین پر بتدریج تنگ ہو رہی ہے ۔ اسلام چاروں طرف پھیلتا جا رہاہے کیا وہ نہیں دیکھتے کہ مسلمان کافروں کو دباتے چلے آ رہے ہیں ۔ اسلام کو غلبہ دینا اور اسے پھیلانا ایسی بات ہے جس کا فیصلہ اللہ کرچکاہے ۔ جسے کوئی طاقت روک نہیں سکتی اور جوں جوں اسلام پھیل رہاہے کفار پرعرصہ حیات تنگ ہوتا جارہاہے۔