سورة القمر - آیت 5

حِكْمَةٌ بَالِغَةٌ ۖ فَمَا تُغْنِ النُّذُرُ

ترجمہ مکہ - مولانا جوناگڑھی صاحب

اور کامل عقل کی بات ہے (١) لیکن ان ڈراؤنی باتوں نے بھی کچھ فائدہ نہ دیا۔

تفسیر القرآن کریم (تفسیر عبدالسلام بھٹوی) - حافظ عبدالسلام بن محمد

حِكْمَةٌۢ بَالِغَةٌ فَمَا تُغْنِ النُّذُرُ: ’’ بَالِغَةٌ ‘‘ کا لفظی معنی پہنچنے والی ہے، مراد انتہا اور کمال کو پہنچی ہوئی حکمت ہے۔ ’’ النُّذُرُ ‘‘ ’’نَذِيْرٌ‘‘ کی جمع ہے، ڈرانے والی چیزیں۔ ’’نَذِيْرٌ‘‘ مصدر بھی ہو سکتا ہے، جس طرح ’’نَكِيْرٌ‘‘ ہے، یعنی تنبیہات، ڈراوے۔ ’’ حِكْمَةٌ ‘‘ پچھلی آیت میں مذکور ’’ مَا فِيْهِ مُزْدَجَرٌ ‘‘ سے بدل ہے۔ یعنی پچھلی امتوں کے واقعات میں سے وہ واقعات جن میں کفر و تکذیب سے باز آنے کا سامان موجود ہے، کامل حکمت اور دانائی کی باتیں ہیں، مگر یہ ڈرانے اور خبردار کرنے والی چیزیں نہ ماننے والوں کو کچھ فائدہ نہیں دیتیں۔ دیکھیے سورۂ یونس ( ۱۰۱)۔