سورة الطور

يَوْمَ تَمُورُ السَّمَاءُ مَوْرًا

جس دن آسمان تھرتھرانے لگے گا (١)

يَوْمَ تَمُوْرُ السَّمَآءُ مَوْرًا: ’’مَارَ يَمُوْرُ مَوْرًا‘‘ (ن) کسی چیز کا تیزی سے حرکت کرنا اور آگے پیچھے اور دائیں بائیں زور سے ہلنا، الٹ پلٹ ہونا، چکر کھانا۔ ’’ مَوْرًا ‘‘ مصدر تاکید کے لیے ہے، اس لیے ترجمہ ’’سخت لرزنا‘‘ کیا گیا ہے۔ ’’ يَوْمَ ‘‘ ’’ لَوَاقِعٌ ‘‘ کا ظرف ہے، یعنی تیرے رب کا عذاب اس دن واقع ہونے والا ہے جب آسمان میں سخت لرزہ پیدا ہو گا اور وہ نہایت تیزی سے چکر کھائے گا اور آخر کار پھٹ جائے گا۔ قیامت کے دن آسمان پر گزرنے والے احوال کے لیے دیکھیے سورۂ فرقان(۲۵)، رحمن(۳۷)، حاقہ(۱۶)، معارج(۸)، مزمل(۱۸)، مرسلات(۹)، نبا(۱۹)، تکویر(۱۱)، انفطار(۱)، انشقاق(۱)، ابراہیم(۴۸)، انبیاء( ۱۰۴) اور سورۂ زمر(۶۷)۔