سورة المآئدہ - آیت 42

سَمَّاعُونَ لِلْكَذِبِ أَكَّالُونَ لِلسُّحْتِ ۚ فَإِن جَاءُوكَ فَاحْكُم بَيْنَهُمْ أَوْ أَعْرِضْ عَنْهُمْ ۖ وَإِن تُعْرِضْ عَنْهُمْ فَلَن يَضُرُّوكَ شَيْئًا ۖ وَإِنْ حَكَمْتَ فَاحْكُم بَيْنَهُم بِالْقِسْطِ ۚ إِنَّ اللَّهَ يُحِبُّ الْمُقْسِطِينَ

ترجمہ مکہ - مولانا جوناگڑھی صاحب

یہ کان لگا کر جھوٹ کے سننے والے (١) اور جی بھر بھر کر حرام کے کھانے والے ہیں اگر یہ تمہارے پاس آئیں تو تمہیں اختیار ہے خواہ ان کے آپس کا فیصلہ کرو خواہ ان کو ٹال دو، اگر تم ان سے منہ پھیرو گے تو بھی یہ تم کو ہرگز کوئی ضرر نہیں پہنچا سکتے اور اگر تم فیصلہ کرو تو ان میں عدل و انصاف کے ساتھ فیصلہ کرو، یقیناً عدل والوں کے ساتھ اللہ محبت رکھتا ہے۔

تسہیل البیان فی تفسیر القرآن - ام عمران شکیلہ بنت میاں فضل حسین

یہودیوں کے خبث باطن کی دیگر وجوہات کے علاوہ دو وجوہات یہ بھی تھیں۔ (۱) مسلمانوں اور رسول اللہ صلی اللہ علیہ وسلم کی مجالس میں آتے ہی اس لیے تھے کہ یہاں سے جو کچھ سنیں اسے اپنے لفظوں میں توڑ مروڑ کہ آپ صلی اللہ علیہ وسلم اور مسلمانوں کو بدنا م کریں۔ (۲) حرام خور ہیں، حرام کھانے والے، رشوت لینے والے آج ہمارے معاشرے میں بھی حرام خوری عام ہے۔ بعض عالم دین فتویٰ دینے کے لیے، عوام کی پسند کا دین پیش کرنے کے لیے نذرانے وصول کرتے ہیں۔ ارشاد نبوی ہے کہ: ’’ایک انسان جھوٹ بولتا رہتا ہے جہنم تک پہنچ جاتا ہے اور ایک انسان سچ بولتا رہتا ہے جنت میں پہنچ جاتا ہے۔‘‘(بخاری: ۶۰۹۴) جی چاہے تو فیصلہ کرو: گویا آپ صلی اللہ علیہ وسلم کو اختیار تو دے دیا گیا کہ چاہیں تو فیصلہ کریں یا نہ کریں لیکن جب کرنا چاہیں تو انصاف کے ساتھ ہی فیصلہ کرنا ہوگا۔ انصاف کرنا آسان نہیں: لیکن اگر اللہ سے ڈر كے اور اللہ کی رضا کے لیے انصاف سے فیصلہ کرتا ہے تو اللہ اُسے پسند کرتا ہے۔ اور عضو کے بدلے عضو: یہی احکام تورات میں ہیں اور کفارہ یعنی معافی نہیں تھی۔ جرم کی سزا برابر کی سزا ہوگی۔ جس شخص کو جسمانی تکلیف دی جائے اور وہ معاف کردے تو اللہ اُس کے درجات بلند کردے گا۔