لَقَدْ مَنَّ اللَّهُ عَلَى الْمُؤْمِنِينَ إِذْ بَعَثَ فِيهِمْ رَسُولًا مِّنْ أَنفُسِهِمْ يَتْلُو عَلَيْهِمْ آيَاتِهِ وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ وَإِن كَانُوا مِن قَبْلُ لَفِي ضَلَالٍ مُّبِينٍ
بیشک مسلمانوں پر اللہ تعالیٰ کا بڑا احسان ہے کہ انہیں میں سے ایک رسول ان میں بھیجا (١) جو انہیں اس کی آیتیں پڑھ کر سناتا ہے اور انہیں پاک کرتا ہے اور انہیں کتاب اور حکمت (٢) سکھاتا ہے یقیناً یہ سب اس سے پہلے کھلی گمراہی میں تھے۔
نبی کا بشر ہونا اور انسانوں میں سے ہی ہونا یہ اللہ تعالیٰ کا احسان عظیم ہے۔ اس طرح وہ اپنی قوم کو قوم ہی کی زبان میں اللہ کا پیغام پہنچائے گا جسے سمجھنا ہر شخص کے لیے آسان ہوگا۔ ہم جنس ہونے کی وجہ سے ایک دوسرے سے قریب اور مانوس ہونگے۔ انسان کے لیے بشر کی پیروی تو ممکن ہے جبکہ فرشتوں کی پیروی اس کے بس کی بات نہیں۔ فرشتے انسان کے شعور کی گہرائیوں تک نہیں پہنچ سکتے۔ اگر پیغمبر فرشتوں میں سے ہوتے تو وہ ان ساری خوبیوں سے محروم ہوتے جو دعوت و تبلیغ کے لیے ضروری ہیں اس لیے جتنے بھی انبیاء آئے سب کے سب بشر ہی تھے ۔ قرآن کریم میں ان کی بشریت کو خوب کھول کر بیان کیا گیا ہے۔ ارشاد باری تعالیٰ ہے: ﴿وَ مَا اَرْسَلْنَا مِنْ قَبْلِكَ اِلَّا رِجَالًا نُّوْحِيْ اِلَيْهِمْ﴾ (یوسف: ۱۰۹) ہم نے آپ( صلی اللہ علیہ وسلم ) سے پہلے جتنے بھی رسول بھیجے وہ مرد تھے جن پر ہم وحی کرتے تھے۔ اور فرمایا: ﴿وَ مَا اَرْسَلْنَا قَبْلَكَ مِنَ الْمُرْسَلِيْنَ اِلَّا اِنَّهُمْ لَيَاْكُلُوْنَ الطَّعَامَ وَ يَمْشُوْنَ فِي الْاَسْوَاقِ﴾ (الفرقان: ۲۰) ’’ہم نے آپ سے پہلے جتنے بھی رسول بھیجے سب کھانا کھاتے اور بازاروں میں چلتے تھے۔‘‘ اور خود نبی صلی اللہ علیہ وسلم کی زبان مبارک سے کہلوایا گیا۔ ارشاد ہے: ﴿قُلْ اِنَّمَا اَنَا بَشَرٌ مِّثْلُكُمْ يُوْحٰى اِلَيَّ﴾ (حٰم السجدۃ: ۶) ’’آپ صلی اللہ علیہ وسلم کہہ دیجئے میں بھی تو تمہاری طرح صرف بشر ہی ہوں البتہ مجھ پر وحی کا نزول ہوتا ہے۔‘‘ انبیاء کی بعثت کے مقاصد: (۱) اللہ کی کتاب جوں جوں نازل ہو وہ لوگوں کو پڑھ کر سنائے تاکہ وہ بھی ان آیات کو سینوں میں محفوظ کرلیں۔ (۲) اپنے پیروکاروں کا تزکیہ نفس کرے ان کے اعمال و افعال پر نظر رکھے ان کی تربیت کرے ۔ (۳) کتاب اللہ کی تعلیم دے اور سکھائے۔ جس کا مطلب یہ ہوا کہ پڑھ کر سنا دینا اور بات ہے اور اس کی تعلیم دینا اور بات ہے۔ تعلیم دینے سے مراد یہ ہے کہ اس کے معنی اور تشریح و تفسیر بھی بتائے۔ (۴) کتاب کے ساتھ حکمت بھی سکھائے حکمت بھی دو طرح کی ہوتی ہے ایک نظری اور دوسری عملی۔ یعنی انھیں آیات اللہ کے اسرار و رموز سے بھی آگاہ کرے اور احکام الٰہی کو عمل میں لانے کے طریقے بھی بتائے، حکمت سے مراد سنّت ہے۔