یعنی وہاں برائی کی مثل ہی جزا ہو گی، زیادہ نہیں۔ اور اس کے مطابق ہی عذاب ہو گا۔ جو عدل و انصاف کا آئینہ دار ہو گا۔ نیکی کرنے والا چاہے مرد ہو، یا عورت، ہاں شرط یہ ہے کہ وہ با ایمان ہو۔ اس کا صاف مطلب یہ ہے کہ اعمال صالحہ کے بغیر ایمان محض یا ایمان کے بغیر عمل صالحہ کی حیثیت اللہ کے ہاں کچھ نہیں ہو گی۔ اللہ کے نزدیک کامیابی کے لیے ایمان کے ساتھ عمل صالحہ اور عمل صالحہ کے ساتھ ایمان ضروری ہے۔ بے حساب رزق: یعنی بغیر اندازے اور حساب کے نعمتیں ملیں گی۔ اور ان کے ختم ہونے کا بھی کوئی اندیشہ نہیں ہو گا۔