سورة ص - آیت 23

إِنَّ هَٰذَا أَخِي لَهُ تِسْعٌ وَتِسْعُونَ نَعْجَةً وَلِيَ نَعْجَةٌ وَاحِدَةٌ فَقَالَ أَكْفِلْنِيهَا وَعَزَّنِي فِي الْخِطَابِ

ترجمہ مکہ - مولانا جوناگڑھی صاحب

(سنیئے) یہ میرا بھائی ہے (١) اس کے پاس نناوے دنبیاں ہیں اور میرے پاس ایک ہی دنبی ہے لیکن یہ مجھ سے کہہ رہا ہے کہ اپنی یہ ایک دنبی بھی مجھ ہی کو دے دے (٢) اور مجھ پر بات میں بڑی سختی برتتا ہے (٣)۔

تسہیل البیان فی تفسیر القرآن - ام عمران شکیلہ بنت میاں فضل حسین

اس تمہیدی مشترکہ بیان کے بعد مدعی نے اپنا مقدمہ پیش کیا کہ یہ (مدعا علیہ) میرا بھائی ہے۔ بھائی سے مراد (دینی بھائی یا شریک کاروبار یا دوست ہے کہ ان سب معانی پر اس لفظ کا اطلاق ہوتا ہے اور جھگڑا یہ ہے کہ اس کے پاس ننانوے دُنبیاں ہیں اور میرے پاس صرف ایک۔ اب یہ کہتا ہے کہ وہ بھی مجھے دے دے۔ اور مجھے اس سے اپنے حق میں بات کرنے کی بھی ہمت نہیں۔ مجھے ایسی بات کرنے ہی نہیں دیتا۔ اور گفتگو میں بھی یہ مجھ پر غالب آ گیا ہے۔