سورة الصافات - آیت 88

فَنَظَرَ نَظْرَةً فِي النُّجُومِ

ترجمہ مکہ - مولانا جوناگڑھی صاحب

اب ابراہیم (علیہ السلام) نے ایک نگاہ ستاروں کی طرف اٹھائی۔

تسہیل البیان فی تفسیر القرآن - ام عمران شکیلہ بنت میاں فضل حسین

قوم ابراہیم اور جشن نوروز: جب سورج برج حمل میں داخل ہوتا تو اس دن یہ قوم جشن نو روز مناتی تھی۔ علی الصبح لوگوں نے اچھے اچھے کھانے پکائے کچھ مندروں میں بتوں کے سامنے نیاز کے طور پر رکھ دئیے۔ اور میلہ میں شمولیت کے لیے روانہ ہونے لگے تو حضرت ابراہیم علیہ السلام کو بھی اس میں شمولیت کی دعوت دی، بلکہ ساتھ لے جانے پر اصرار کیا۔ لیکن حضرت ابراہیم علیہ السلام تنہائی اور موقعہ کی تلاش میں تھے تاکہ بتوں کا تیا پانچہ کیا جا سکے۔ آپ کو فوراً ایک ترکیب سوجھی جو قوم کے مزاج کے موافق تھی۔ آپ نے ستاروں پر نظر ڈالی پھر کہنے لگے کہ میں تو آج بیمار ہونے والا ہوں۔ قوم نے اپنے اعتقاد کے مطابق اس عذر کو معقول سمجھا اور انھیں پیچھے چھوڑ جانے پر رضا مند ہو گئے۔