سورة النمل

فَلَمَّا جَاءَتْهُمْ آيَاتُنَا مُبْصِرَةً قَالُوا هَٰذَا سِحْرٌ مُّبِينٌ

پس جب ان کے پاس آنکھیں کھول دینے والے (١) ہمارے معجزے پہنچے تو کہنے لگے یہ تو صریح جادو ہے۔

موسیٰ علیہ السلام اپنے بھائی ہارون علیہ السلام کے ہمراہ فرعون کے دربار میں پہنچے۔ اسے اللہ کاپیغام بھی پہنچایا اور اپنی رسالت کی صداقت کے طورپریہ دونوں معجزات بھی دکھائے لیکن ان لوگوں نے معجزات کو جادو کے کرشمے یا شعبدہ بازیاں کہہ دیا۔ حالانکہ ان کے دلوں میں یہ یقین آگیاتھاکہ یہ معجزات فی الواقع اللہ کی عطا کردہ نشانیاں ہیں ۔ جادو کے کرشمے نہیں ہیں اور موسیٰ علیہ السلام فی الواقع اللہ کے رسول ہیں مگر یقین کے باوجود انکار کردینا محض تکبر کی بنا پر تھا۔ پھر دیکھ لیں کہ ان مفسدوں کاانجام کس قدر حیرت ناک اور کیسا عبرت ناک ہوا۔