سورة البقرة - آیت 12

أَلَا إِنَّهُمْ هُمُ الْمُفْسِدُونَ وَلَٰكِن لَّا يَشْعُرُونَ

ترجمہ مکہ - مولانا جوناگڑھی صاحب

خبردار ہو یقیناً یہی لوگ فساد کرنے والے ہیں (١) لیکن شعور (سمجھ) نہیں رکھتے۔

تسہیل البیان فی تفسیر القرآن - ام عمران شکیلہ بنت میاں فضل حسین

زبان سے کہتے ہیں کہ ہم ایمان لائیں گے مگر ساتھ اپنے لوگوں کا دیتے ہیں۔ سچا مومن تو پوری طرح اپنے آپ کو اللہ کے حوالے کردیتا ہے۔ حدیث:… منافق کی چند نشانیاں ہیں نبی صلی اللہ علیہ وسلم نے فرمایا: (۱)جب بات کرے تو جھوٹ بولے ۔ (۲) جب امانت رکھوائی جائے تو خیانت کرے ۔(۳) جب وعدہ کرے تو وعدہ خلافی کرے۔ (۴) اختلاف ہوتو جھگڑا کرے۔آپ صلی اللہ علیہ وسلم نے فرمایا: یہ چار خصوصیات جس میں پائی جائیں وہ منافق ہے جس میں ایک خصلت پائی گئی وہ بھی منافق ہے یہاں تک کہ وہ اُسے چھوڑدے۔(بخاری:۳۴) آپ صلی اللہ علیہ وسلم نے فرمایا: ’’بدترین شخص وہ ہے جوکسی کے سامنے ایک رخ اور دوسرے کے سامنے دوسرا رخ رکھے یعنی دو چہروں والا انسان۔‘‘ (بخاری: ۷۱۷۹۔ مسند احمد: ۲۰/ ۳۰۷، ح: ۸۰۵۵) رسول اللہ صلی اللہ علیہ وسلم نے فرمایا : ’’حرام کھلا ہوا ہے اور حلال بھی کھلا ہوا ہے۔‘‘ (بخاری: ۵۲)